Kanadada balanyń qylyǵy ushaq reısiniń toqtaýyna sebep boldy
ASTANA. KAZINFORM — Kanadalyq Porter Airlines áýe kompanııasynyń reısi aldyńǵy aptada kishkentaı bala óz ornyna otyryp, qaýipsizdik beldigin taǵýdan bas tartqannan keıin toqtatyldy. Bul týraly Associated Press agenttigi jazdy.
Ushaqty termınalǵa qaıtarýǵa týra kelgen. Al osyǵan baılanysty týyndaǵan kidiris saldarynan áýejaı reıs ushyp úlgermeı turyp, ushý-qoný jolaǵyn jaýyp tastaǵan.
Porter Airlines kompanııasynyń jeksenbi kúni habarlaýynsha, ata-anasy men ekıpaj músheleri balany birneshe ret ornyna otyrǵyzyp, qaýipsizdik beldigin taǵýǵa tyrysqan. Alaıda ony kóndirý múmkin bolmaǵan. Nátıjesinde ushaq Brıtandyq Kolýmbııadaǵy Vıktorııa halyqaralyq áýejaıynyń termınalyna oraldy. Ata-anasy balasymen jáne júk-bagajymen birge ushaqtan túsken.
Beısenbi kúni Torontoǵa baǵyt alǵan reıs túngi saǵat 00:30-ǵa deıin, ıaǵnı áýejaıdaǵy ushý-qoný jolaǵy jabylatyn ýaqytqa deıin keshikti. Osyǵan baılanysty qalǵan jolaýshylar da ushaqtan shyǵýǵa májbúr boldy.
Porter Airlines jolaýshylardan keshirim surady. Olar kelesi kúni Torontoǵa ushatyn reıske qaıta otyrǵyzyldy.
Eske salaıyq, buǵan deıin AQSh-ta daýylǵa baılanysty 2000-nan astam reıs toqtaǵanyn habarlaǵanbyz.
