Kanadada BA.2.86 koronavırýsynyń qatty mýtatsııalanǵan túrin juqtyrǵan alǵashqy adam tirkeldi

OTTAVA. QazAqparat - Kanadada koronavırýs ınfektsııasynyń BA.2.86 omıkrondyq shtamynyń qatty mýtatsııalanǵan nusqasyn juqtyrǵan birinshi jaǵdaı anyqtaldy, dep habarlaıdy QazAqparat Reuters-ke silteme jasap.

Vırýs shtamyn Brıtandyq Kolýmbııa turǵyny juqtyrǵan, ol keıingi kezde provıntsııadan shyqpaǵan, dep habarlady seısenbide jergilikti bılik.

Sheneýnikterdiń aıtýynsha, Kanada men provıntsııada BA.2.86 shtamynyń paıda bolýy tańǵalarlyq jaǵdaı emes, sebebi COVID-19 áli de búkil álemge taralyp, beıimdelip jatyr. Ótken aıda Danııada alǵash ret tabylǵan BA.2.86 nusqasy 2023 jyldyń kóp bóligindegi basym bolǵan HVV.1.5 koronavırýs nusqasymen salystyrǵanda vırýstyń negizgi bólikterinde 35-ten astam mýtatsııany qamtıdy.

AQSh, Shveıtsarııa jáne Izraılde de vırýstyń jańa shtamyn juqtyrý jaǵdaılary tirkeldi. AQSh-tyń Aýrýlardy baqylaý jáne aldyn alý ortalyqtarynyń málimdeýinshe, BA.2.86 nusqasy buryn COVID-19 juqtyrǵan nemese vaktsına alǵan adamdarda ınfektsııa týdyrýy múmkin. Ǵalymdar BA.2.86 baqylaýǵa alynǵanyn, biraq búkil álemde vaktsınalaý men aldyńǵy ınfektsııa arqyly qalyptasqan ımmýndyq qorǵanysty eskere otyryp, jańa nusqa aýyr dertke jáne ólim jaǵdaıyna ákelýi ekitalaı ekenin málimdedi. Kanadanyń densaýlyq saqtaý organdary sońǵy aptalarda COVID juqtyrý jaǵdaıynyń artqanyn atap ótti.