Kanadada áýekompanııa qyzmetkeri jolaýshydan hıdjabyn sheshýdi talap etti

ASTANA. KAZINFORM — Kanadada Flair áýekompanııasynyń reısinde jumys istegen qyzmetker musylman áıelden hıdjabyn sheshýdi talap etip, bul áleýmettik jelilerde jáne quqyq qorǵaý uıymdary tarapynan úlken narazylyq týdyrdy, dep habarlaıdy Anadoly.

Anasyna qatysty oqıǵany baıandap bergen Afsara Raıda qyzmetkerdiń hıdjabty sheshýdi talap etkenin, onyń sebebi áıeldiń tólqujattaǵy sýreti hıdjab kıgenge deıin túsirilgenin aıtqanyn jetkizdi.

Raıda anasynyń bet-álpeti qujattaǵy sýretke tolyq sáıkes kelgenin aıtty. Ákesi narazylyq bildirgende qyzmetker sýretti jańartý kerek ekenin aıtqan.

— Búgin Flair Airlines anamnyń quqyǵyn buzyp, ony Torontodaǵy Pırson halyqaralyq áýejaıynda kópshilik kózinshe qorlady. Biz bul oqıǵadan keıin únsiz qalmaımyz, — dep jazdy Raıda Facebook-tegi paraqshasynda.

Raıda bul jaǵdaıdyń ıslamofobııanyń kórinisi ekenin atap ótti.

— Bul din bostandyǵyn jáne negizgi adam quqyqtaryn buzý boldy. Al bul oqıǵa ártúrlilikke, ınklıýzıvtikke jáne syılastyqqa basymdyq beretin el Kanadada boldy, — dedi ol.

«Anadoly» agenttiginiń saýalyna jaýap bergen Flair Airlines ókilderi atalǵan adam jerústi qyzmetterin kórsetetin AGI kompanııasynyń qyzmetkeri ekenin habarlady.

AGI kompanııasy Raıdanyń otbasynan keshirim surap, atalǵan qyzmetkerdiń ákimshilik tekserý kezinde mindetterinen bosatylǵanyn málimdedi.

Flair Airlines kompanııasynyń bas dırektory Macheı Vılk barlyq seriktesterinen qurmetpen, kásibı deńgeıdi kórsetip, kemsitýshiliksiz jumys isteýdi talap etetinin aıtty.

Kanada musylmandary ulttyq keńesi (NCCM) oqıǵaǵa baılanysty alańdaýshylyǵyn bildirip, advokattardyń iske aralasqanyn habarlady.

— Kanadadaǵy áýejaılarda jáne áýekompanııalarda ıslamǵa qarsy kózqarasqa oryn bolmaýy tıis, — delingen málimdemede.

Budan buryn Frantsııa Іshki ister mınıstri JOO-larda hıdjab kııýge tyıym salýdy qoldaǵanyn jazǵanbyz.