Kanadada áskerı ushaq turǵyn úıge qulap, bir adam mert boldy
OTTAVA. QazAqparat – Kanada koroldik áskerı áýe kúshteriniń málimetinshe, Brıtan Kolýmbııasynyń Kamlýps qalasynda kanadalyq qarýly kúshterdiń Snowbirds ushaǵy apatqa ushyraǵan. Oqıǵa saldarynan bir adam mert bolyp, ekinshisi jaraqat aldy. Bul týraly QazAqparat CNN agenttigine silteme jasap habarlaıdy
«Biz CF Snowbirds komandasy músheleriniń biri qaıtys bolǵanyn, ekinshisi aýyr jaraqat alǵanyn habarlaımyz» dedi koroldiktiń resmı ókili Twitter paraqshasyndaǵy habarlamasynda.
Ol sondaı-aq oqıǵa boıynsha qosymsha aqparat jaqyn arada belgili bolatynyn atap ótti.
Bılik ushaq apaty týraly habarlamany tańerteń saǵat 11:42-de alǵan. Snowbirds ushaǵy Vankýverden soltústik-shyǵysqa qaraı 150 mıl jerde ornalasqan Kamlýps qalasynyń Glenvıý-avenıýdegi úıge soǵylǵan.
Snowbirds el turǵyndary úshin áýeshoýyn kórsetedi.
Kanada Qarýly kúshteriniń áskerı qyzmetshilerinen jáne Ulttyq qorǵanys memlekettik qyzmetiniń qyzmetkerlerinen turatyn komanda 2 mamyrda Covid-19 vırýsynyń taralýyna qarsy kúreske óz úlesin qosqan kanadalyqtardy qoldaý úshin áýeshoý ótkize bastady.
Qaýipsizdik jáne retteý organdary apattyń sebepterin tekserýdi bastady. Áskerı qyzmetkerler Kamlýpske tergeý toby jiberilgenin habarlady. Olar sondaı-aq ushaqtyń apatqa ushyraý sátin kameraǵa túsirip úlgergen kez kelgen adamnyń habar berýin suraıdy.
