Kanadada aptap ystyqtan aýyl órtendi
OTTAVA. QazAqparat – Kanadanyń batysyndaǵy Brıtanııalyq Kolýmbııa provıntsııasyndaǵy orman órti Lıtton shaǵyn qalasyn jermen jeksen etti. Sebebi – óńirde tirkelgen anomaldy ystyq. Bul týraly QazAqparat BBC-ge silteme jasap habarlaıdy.
Qaıtys bolǵandar týraly málimet joq, degenmen polıtsııa keıbir otbasylardyń baılanysqa shyqpaǵanyn habarlaıdy, zardap shekkender bar.
Lıttonda myńǵa jýyq adam turady. Órt tez jyljyp otyrǵandyqtan, olardyń jınalýǵa tek qana tórt saǵat ýaqyty bolǵan. Evakýatsııa iri tútin býdaqtary men joldardyń shetin jalmaǵan alaýǵa qaramastan júrgizildi.
«15 mınýttyń ishinde aýyldyń barlyǵy otqa orandy», - dedi Bı-Bı-Sıge mer Polderman.
«Adamdar úı janýarlaryn, kiltterin alyp, kólikterine otyryp, ketip jatty», - dedi ol.
Aýyl úıleriniń 90%-y, medıtsınalyq pýnkt jáne polıtsııa bólimshesi janyp ketken.
29 maýsym kúni jergilikti ýaqyt boıynsha saǵat 16:20-da Lıttonda Brıtandyq Kolýmbııanyń tarıhynda temperatýralyq rekord ornady: Tselsıı boıynsha 46,6 gradýs.
Sonymen qatar jeldiń jyldamdyǵy 71 km/saǵ bolǵan, bul órttiń tez jyljýyna sebep boldy. Meteorologtardyń aıtýynsha, bul aýdandaǵy ystyq, qurǵaq aýa raıy men jel órttiń 10 nemese 20 km/saǵ jyldamdyqpen jyljyp otyrýyna sebep bolǵan.
Jergilikti depýtat Bred Vıs áleýmettik jelilerde zardap shekkender týraly habar bar ekenin jazdy.
Sońǵy aptada Kalıfornııadan Arktıkaǵa deıingi Tynyq muhıtynyń jaǵalaýynda aýanyń jyljýyna kedergi keltiretin joǵary qysym turaqtanǵan aýmaq qalyptasty.
Brıtandyq Kolýmbııada osy ýaqytqa deıin ystyqtan 486 adam qaıtys boldy, olardyń 69-y el astanasy Vankýverde kóz jumǵan. Qaıtys bolǵandardyń kóbi – egde jastaǵylar men sozylmaly aýrýy bar adamdar. Uqsas habarlar AQSh-tan da túsýde.
Bir aptanyń ishinde Brıtandyq Kolýmbııada júzdegen orman órti tutandy. Buǵan ystyqpen birge naızaǵaı da sebep boldy. 2 shilde kúni provıntsııada 29 myńǵa jýyq naızaǵaı tirkeldi.
«Bul Brıtandyq Kolýmbııadaǵy tarıhyndaǵy eń ystyq apta boldy», - dedi baspasóz máslıhatynda provıntsııanyń premer-mınıstri Djon Horgan seısenbi kúni.
Ol turǵyndardy sýyq kompress jasap, múmkindiginshe úıdiń eń salqyn bóliginde qalýǵa shyqyrdy.
Meteorologtardyń aıtýynsha, mundaı aýa raıy myń jylda bir ret bolady. Olar ystyqtyń áli birneshe kún jalǵasatynyn eskertti.
Budan buryn AQSh prezıdenti Djo Baıden osy jyly orman órtiniń qaýpi zor ekenin eskertken, bul týraly Kanadanyń premer-mınıstri Djastın Trıýdo da aıtqan.
