Kanadada aptap ystyqtan 70 adam qaıtys boldy
ASTANA. QazAqparat - Ótken aptada Kanadanyń Kvebek provıntsııasynda baıqalǵan aptap ystyq saldarynan 70 adam qaıtys boldy, dep habarlaıdy «QazAqparat» HAA CNN-ge silteme jasap.
Kanada Densaýlyq saqtaý mınıstrliginiń málimdeýinshe, Monreal qalasynyń ózinde 34 adam ómirimen qosh aıtysqan. Sodan beri aýa temperatýrasy birshama tómendep, synap baǵany Farengeıt boıynsha 81 gradýs (27°C) pen 55 gradýs (13°C) aralyǵyn kórsetip otyr.
Kvebek provıntsııasynyń qoǵamdyq densaýlyqty saqtaý departamenti keshe jaǵdaı rettelgenin málimdegen.
Al CBC taratqan habarlarǵa qaraǵanda, Monrealdaǵy máıithana máıitterge tolǵan. Aptap ystyqtan qurban bolǵandardyń basym kópshiligin 60 jastan asqandar jáne sozylmaly aýrýdan zardap shekkender quraıdy.
