Kanadada 40 avtokólik qaqtyǵysty
ASTANA. QazAqparat - Kanadada boran men kóktaıǵaqtyń saldarynan 40 avtokólik soǵylyp qaldy. Apattyń saldarynan 33 adam zardap shegip, onyń 7-eýi aýyr halde aýrýhanaǵa jatqyzyldy.
Jappaı jol-kólik apaty Kvebek provıntsııasynyń Sent-Adel qalasynyń mańyndaǵy 15-shi tasjolda oryn alǵan. Apat jolǵa muz qatyp jáne kúshti boran saldarynan bolǵan. Qatty zaqymdanǵan kólikterdiń ishindegi adamdardy shyǵaryp alý úshin qutqarýshylarǵa gıdravlıkalyq qural-jabdyqtardy qoldanýǵa týra kelgen. Tasjoldaǵy qozǵalys tek keshke ǵana qalpyna keltirildi, dep habarlaıdy lenta.ru.
Agenttiktiń habarlaýynsha, sol kúni keshke qaraı dál osy 15-shi tasjoldyń boıynda, Mırabel qalasynyń mańynda 30 avtokóliktiń qatysýymen taǵy bir iri jol-kólik oqıǵasy tirkelgen. Bul joly zardap shekkender týraly aqparattar bolǵan joq.
Al osy jolǵa parallel 117-shi tasjolda da kúni boıy qozǵalys bir toqtap, bir jandanyp turǵan. Bul jolda da irili-usaqty jol-kólik oqıǵalary oryn aldy.
