Kanadada 10 adamdy pyshaqtap óltirgen kúdikti ustaldy
NUR-SULTAN. QazAqparat - Kanada polıtsııasy bir kúnde 10 adamdy óltirip, taǵy 18 adamdy jaraqattady degen kúdikke ilingen Maılz Sandersondy ustady, dep habarlaıdy QazAqparat BBC jańalyqtaryna silteme jasap.
Polıtsııa Sandersondy úsh kún boıy Kanadanyń úsh úlken provıntsııasynan izdep, aqyry Saskachevan provıntsııasyndaǵy Rostern qalasynan tapty.
Sandersonǵa qasaqana kisi óltirý jáne óltirýge oqtalý degen aıyptar taǵylǵan.
Sanderson jáne onyń aǵasy bolýy múmkin dep boljanǵan qaıtys bolǵan azamat jaralaǵan on adam áli aýrýhanada jatyr, úsheýiniń jaǵdaıy aýyr.
Qandy qyrǵyn jeksenbi kúni Saskachevannyń shalǵaı aımaǵynda, kanadalyq krı úndisteri qaýymdastyǵynyń Djeıms Smıt aýmaǵynda boldy.
Dúısenbi kúni polıtsııa Maılz Sandersonnyń aǵasy Demıenniń denesin tapty.
Onyń denesi sol úndi qaýymdastyǵynda, polıtsııa tintý júrgizip jatqan úıdiń janyndaǵy qalyń shóptiń arasynan tabyldy. Demıenniń denesinde jaraqat belgileri bolǵan.
Polıtsııa, birinshiden, Demıenniń kisi óltirýge qatysy bar-joǵyn, ekinshiden, ony aǵasy óltirgen-óltirmegenin anyqtaıdy.
Maılz Sandersonnyń buǵan deıingi qylmystary kóp. Jeke adamǵa jáne múlikke qarsy qylmys úshin birneshe ret sottalǵan jáne bılik onyń tórt jyldyq jazasyn ótegennen keıin aqpan aıynda nelikten shartty túrde túrmeden bosatylǵanyn qaıta tekserip jatyr.
Eske sala keteıik, Kanadanyń ortalyq Saskachevan provıntsııasynda bolǵan shabýyldan kem degende 10 adam qaza taýyp, taǵy 15 adam pyshaq jaraqatyn alǵan bolatyn.
Keıinnen Kanada polıtsııasy 10 adamdy pyshaqtap óltirgen aǵaıyndylardyń bireýiniń denesi tabylǵanyn málimdegen edi.
