Kanadada 10 adamdy pyshaqtap óltirgen aǵaıyndylardyń bireýiniń denesi tabyldy
NUR-SULTAN. QazAqparat – Kanada polıtsııasy jeksenbide eldiń Saskachevan provıntsııasynda jappaı kisi óltirdi degen eki kúdiktiniń biri óli tabylǵanyn málimdedi, dep habarlaıdy QazAqparat BBC agenttigine silteme jasap.
Vedomstvo málimetinshe, 31 jastaǵy Demıen Sandersonnyń máıiti qaza tapqandardyń kópshiligi turǵan kanadalyq krı úndisteriniń Djeıms Smıt qaýymdastyǵynyń aýmaǵynan tabylǵan.
Kúdiktiler aǵaıyndy bolyp shyqty. Polıtsııanyń habarlaýynsha, Maılz Sanderson áli bostandyqta júr, provıntsııanyń astanasy Redjaına qalasynda júrýi múmkin.
Eske sala keteıik, jeksenbi kúni Kanadanyń ortalyq Saskachevan provıntsııasynda bolǵan shabýyldan kem degende 10 adam qaza taýyp, taǵy 18 adam pyshaq jaraqatyn alǵan.
Polıtsııa komıssarynyń kómekshisi Ronda Blekmor baspasóz máslıhatynda Demıenniń máıiti polıtsııa tintý júrgizgen úıdiń janyndaǵy qalyń shópti aımaqta ashyq jerden tabylǵanyn aıtty.
Onyń aıtýynsha, Demıenniń denesinde jaraqat izi bolǵan.
Polıtsııa onyń aǵasy Maılzdiń áli qashyp júrgenin aıtyp, adamdardy saq bolýǵa shaqyrdy.
Maılz birneshe ret sottalǵan jáne jeke tulǵa men múlikke qarsy qylmysy úshin birneshe ret jaýapqa tartylǵan.
Bul oqıǵa Saskachevan provıntsııasyn dúr silkindirdi, onda polıtsııa 13 túrli jerde bolǵan shabýyldardy tergep jatyr.
«Bizdiń elde mundaı jáne basqa da zorlyq-zombylyqqa oryn joq», - dedi dúısenbide Kanada premer-mınıstri Djastın Trıýdo.
Qurban bolǵandardyń kópshiligi – 2000-ǵa jýyq halqy bar kanadalyq krı úndisteri turatyn Djeıms Smıt rezervatynyń turǵyndary.
Saskachevanda tótenshe jaǵdaı jarııalandy.
Foto: bbc.com
