Kanada jurtshylyǵy «kıt-bomba» jarylyp kete me dep alańdaýly - VIDEO
ASTANA. QazAqparat - Kanadanyń Traýt Rıver atty shaǵyn qalasynyń jaǵalaýyna uzyndyǵy 25 metrden asatyn alyp kıttiń denesi shyǵyp qaldy. Keıin anyqtalǵandaı, kıt ólip qalǵan eken. Bul oqıǵa jergilikti turǵyndardy áýre-sarsańǵa salyp otyr. Sebebi, birinshiden, kıttiń denesi buzylyp, aınalany múńkitip jibergen. Ekinshiden, kıttiń ishki qurylysy kóbine túrli gazdarǵa toly bolatyndyqtan, onyń jarylý qaýpi bar, dep jazady Metro.
«Kıt kenet jarylyp ketip, bireý japa shege me dep qorqamyz», - deıdi Traýt Rıver dúkenderiniń birinde satýshy bolyp jumys isteıtin Emılı Batler.
Jergilikti turǵyndar kómek surap ekologııa qyzmetkerlerine habarlasqan kórinedi. Biraq olar kómekke kele qoımaǵan.
Kıttiń denesi jarylady degenge senbeıtinder de bar eken. «Ol bir sátte parsha-parshasy shyǵyp atylyp ketedi degen qaýip óte az. Menińshe, gaz óz-ózimen aýaǵa tarap, quryp joǵalady, - deıdi kanadalyq Balyq aýlaý basqarmasynyń ókili Djek Loýson. - Jarylys eger bir aqymaq kıttiń denesin pyshaqpen tilse nemese bireý onyń ústine syrǵanaq teppek bolsa ǵana oryn alýy múmkin».
Alaıda buǵan deıin kıt jarylǵan oqıǵalar tirkelgen. Ótken jyly Farer araldarynda óli kıttiń denesi atylyp ketip, jergilikti murajaı qyzmetkerin jazym ete jazdaǵan. Taǵy bir jarylys ótken qarashada Ýrýgvaıda bolypty.
