Kanada turǵyny bos konteınerden 2 mln dollar taýyp aldy
ASTANA. QazAqparat - Kanada turǵyny on jyl buryn satyp alyp, kópir retinde paıdalanǵan júk konteıneriniń ishinde eshteńe joq ekenine senimdi bolǵan.
Kúnderdiń kúninde Djon Ýılson ony ashyp, ishinen quny shamamen 2 mln dollar bolatyn reaktıvti qozǵaltqysh taýyp alady.
«cbc.ca» portaly jazǵandaı, qozǵaltqyshty taýyp alǵan kezde oǵan eń birinshi «túrmege qamaıdy» degen oı kelgen. Ýılson bul qozǵaltqyshtar buryn Koroldik kanadalyq HMCS Athabaskan flotynyń kemesine ornatylǵanyn aıtady. 1994 jyly jańǵyrtylǵan kezde eski qozǵaltqyshtardy alyp tastap, germetıkalyq konteınerlerge ornalastyrǵan, keıinnen, belgisiz sebeptermen bos konteıner retinde satylǵan.
Djon osy konteınerlerdiń birin nebári 400 dollarǵa satyp alǵan.
Kanada turǵyny ózin qozǵaltqyshtyń zańdy ıegeri sanaıdy, búginde quny 2 mln dollarlyq zatty ınternet-bássaýdaǵa satylymǵa qoımaq.
