Kanada taýarlaryna salynǵan 50% baj salyǵy sot daýyna ulasty
ASTANA. KAZINFORM — Amerıkalyq azyq-túlik ımporttaýshy Gellert Global Group Kanadanyń keıbir taýarlaryna salynǵan 50 paıyzdyq baj salyǵyna baılanysty Tramp ákimshiligin sotqa berdi. Bul kompanııaǵa jyl saıyn shamamen 40 mln dollar shyǵyn ákelýi múmkin, dep habarlaıdy Kazinform agenttiginiń Vashıngtondaǵy menshikti tilshisi FOX Business basylymyna silteme jasap.
Nıý-Djersı shtatynda ornalasqan kompanııa «Lıbertı» ádilet ortalyǵynyń qoldaýymen AQSh-tyń Halyqaralyq saýda sotyna shaǵym túsirip, baj salyǵynyń zańsyz ekenin alǵa tartty.
AQSh prezıdenti Donald Tramp jazda 1930 jylǵy Tarıfter týraly zańnyń 338-babyna súıenip, Kanadadan ákelinetin keıbir taýarlarǵa 50 paıyzdyq baj salyǵyn engizdi. Qyrkúıekte ákimshilik baj salynatyn taýarlar tizimin keńeıtip, oǵan Gellert kompanııasy ımporttaıtyn irimshikti de qosty.
«Lıbertı» ádilet ortalyǵy sottan baj salyǵyn zańsyz dep tanýdy, ony óndirip alýǵa tyıym salýdy jáne tólengen qarajatty paıyzymen qaıtarýdy talap etedi.
Shaǵymǵa sáıkes, Gellert buǵan deıin AQSh-Meksıka-Kanada saýda kelisimine (USMCA) sáıkes kanadalyq irimshikti baj salyǵynsyz ımporttaǵan. Biraq 28 qyrkúıekte kompanııa quny shamamen 120 000 dollar bolatyn eshki sútinen jasalǵan irimshik partııasyn ımporttap, 60 myń dollardan astam baj salyǵyn tólegen.
Buǵan deıin AQSh-ta aralyq saılaýǵa eki apta qalǵanda Demokratııalyq partııa jetekshileri prezıdent Donald Tramp ákimshiligine shaǵymdanyp federal sotqa júgingenin habarlaǵanbyz.
