Kanada shaıbaly hokkeıden 28-márte álem chempıony atandy

ASTANA. QazAqparat - Kanada quramasy Germanııany jeńip, shaıbaly hokkeıden 2023 jylǵy álem chempıony boldy, dep habarlaıdy QazAqparat tilshisi.

Kezdesý barysynda qos qurama belsendi oıyn kórsetti. Birinshi kezeńde germanııalyq hokkeıshiler alǵashqy bolyp esep ashty. Olardyń qatarynan 7-mınýtta Djon-Djeıson mergendik tanytty. Kóp uzamaı Kanada quramasy tarazy basyn teńestirip úlgerdi. Bul goldy kanadalyq Semmı Ble 10-mınýtta óz enshisine jazdy.

Ekinshi kezeńde de qos qurama qarqyny báseńdegen joq. Kanadalyq hokkeıshiler birneshe múmkindikti qur jiberip aldy. Saldarynan germanııalyq Danıel Fıshbýh 33-mınýtta óz quramasyn alǵa shyǵarsa, 37-mınýtta kanadalyq Loýson Krýe kózdegen nysanadan múlt ketken joq. Esep - 2:2.

Úshinshi kezeńde kanadalyq hokkeıshiler qatarynan eki shaıba soǵyp ketti. Atap aıtqanda Semmı Ble - 44, Taıler Toffolı - 51, Skott Loton 58-mınýtta basymdyqty arttyrdy.

Osylaısha Kanada quramasy qarsylasynan 5:2 esebimen basym tústi.

Aıta ketsek, Kanada quramasy qazirge deıin 27 márte chempıon atandy. Sondaı-aq 16 márte ekinshi oryn alsa, 9 ret úzdik úshtikten kórindi.

Al Germanııa 1930, 1953 jyldarda «kúmis» alsa, 1932, 1934 jyldarda «qola» júldeger boldy.

Eske salsaq, budan buryn shaıbaly hokkeıden álem chempıonatynda Latvııa óz tarıhynda tuńǵysh márte «qola» júlde alǵanyn jazǵan edik.

Sondaı-aq Qazaqstan quramasy bıyl elıtalyq dıvızıondaǵy ornyn saqtap qaldy.