Kanada pandemııanyń tórtinshi tolqynyna daıyndalýda

NUR-SULTAN. QazAqparat – Kanada pandemııanyń tórtinshi tolqynyna daıyndalýda. Al Ońtústik Koreıa qyrkúıek aıynyń sońyna deıin el halqynyń 70% ımmýndaýdy josparlap otyr. QazAqparat bul týraly Qazaqstanda koronavırýstyń taralýyna jol bermeý jónindegi vedomstvoaralyq komıssııanyń Telegram-kanalyna silteme jasap habarlaıdy.

Kanada pandemııanyń tórtinshi tolqynyna daıyndyq júrgizýde. Eldiń federaldy úkimeti osy aptada Pfizer-BioNTech COVID-19 vaktsınasynyń 2,3 mıllıonnan astam dozasyn alýdy josparlaýda.

Densaýlyq saqtaý qyzmetkerleri koronavırýstyń tórtinshi tolqynyna ázirlik jumystaryn bastap ketti.

Kanadanyń Bas sanıtarııalyq dárigeri Tereza Tem vaktsınatsııa deńgeıi eń joǵary shekti kórsetkishke jetkenge deıin karantındik shekteýler alynyp tastalsa, el pandemııanyń tórtinshi tolqynyna tap bolýy múmkin ekendigin eskertti. Osy málimdemeden keıin úkimet COVID-19 vırýsyna qarsy vaktsınanyń jańa dozalaryna tapsyrys bergen.

Ońtústik Koreıa ujymdyq ımmýnıtet qalyptastyrýǵa barynsha tyrysyp baǵýda. «Jaqynda COVID-19-ǵa qarsy tolyq nemese ishinara vaktsınatsııadan ótken el turǵyndarynyń sany 20 mıllıon adamǵa jetedi», - dedi el prezıdenti Mýn Chje In.

Prezıdent vaktsınatsııa aýyr asqynýlardyń paıda bolý qaýpin jáne sáıkesinshe ólim deńgeıin tómendetý úshin qajet ekenin atap ótti.

Jappaı ımmýndaý josparyna sáıkes qyrkúıek aıynyń sońyna qaraı 36 mıllıonǵa jýyq azamat COVID-19 vaktsınasynyń kem degende bir dozasyn alady, bul el halqynyń 70% quraıdy.