Kanada Palestına memleketin qyrkúıekte moıyndaıdy — premer-mınıstr

ASTANA. KAZINFORM — Kanada Palestına memleketin qyrkúıek aıynda moıyndaýdy josparlap otyr. Bul týraly sársenbi kúni eldiń premer-mınıstri Mark Karnı málimdedi, dep jazady Sınhýa.

Onyń keńsesi taratqan habarlamada aıtylǵandaı, Kanada Birikken Ulttar Uıymy Bas Assambleıasynyń 80-sessııasynda Palestına memleketin moıyndamaq, óıtkeni «eki halyqqa — eki memleket» josparyn júzege asyrý bolashaǵy qatty ári tereń túrde buzylǵan.

— Bul nıet Palestına Ulttyq Ákimshiliginiń asa qajet reformalarǵa beıildiligine negizdelgen, sonyń ishinde Palestına Ulttyq Ákimshiliginiń prezıdenti /Mahmýd/ Abbastyń basqarý júıesin túbegeıli ózgertýge, 2026 jyly jalpyulttyq saılaý ótkizýge (ol saılaýǵa HAMAS qatysa almaıdy), jáne Palestına memleketin qarýsyzdandyrýǵa mindetteme alǵany eskeriledi, — delingen málimdemede.

Sondaı-aq Kanada HAMAS barlyq tutqyndy dereý bosatýy jáne qarý-jaraqtan bas tartýy kerek ekenin qaıta atap ótti. Premer-mınıstr keńsesinde aıtylǵandaı, bul qozǵalys bolashaq Palestına basqarýynda eshqandaı ról atqarmaýy tıis.

Budan buryn Ulybrıtanııa premer-mınıstri Kır Starmer eger Izraıl Gaza sektoryndaǵy atysty toqtatýǵa jáne uzaqmerzimdi beıbitshilikke baǵyttalǵan naqty qadamdarǵa barmasa, qyrkúıek aıynda Palestına memleketiniń táýelsizdigin moıyndaıtynyn málimdedi.

Sonymen qosa Frantsııa Palestınany memleket retinde resmı tanýǵa sheshim qabyldady. Biraq Amerıka Qurama Shtattary Frantsııanyń Palestınany memleket retinde taný týraly sheshimin qoldamady.