Kanada men Meksıka AQSh-qa qarsy baj salyǵyn engizbek

ASTANA. KAZINFORM — Kanada amerıkalyq taýarlarǵa jalpy quny 155 mlrd kanadalyq dollar shamasynda 25% tarıfter engizedi, dep habarlaıdy TASS.

Al Meksıka Vashıngtonmen dıalog ornatýdy usyna otyryp, tarıftik jáne tarıftik emes shekteýler daıyndaıdy.

Kanada Premer-mınıstri Djastın Trıýdo 6 aqpannan bastap quny 30 mlrd CAD-ty, al 21 kúnnen keıin taǵy 125 mlrd CAD-ty quraıtyn amerıkalyq taýarlarǵa 25% baj salyǵy engiziletinin atap ótti. Onyń aıtýynsha, bul kanadalyq kompanııalarǵa beıimdelýge múmkindik beredi.

— Jaýap retinde biz provıntsııalarmen jáne aýmaqtarmen birlese otyryp, kedendik bajdardy engizýge baılanysty emes birneshe sharany, sonyń ishinde mańyzdy mıneraldar men energııa resýrstaryn jetkizýge, sondaı-aq seriktestiktiń basqa túrlerine qatysty sharalardy qarastyramyz, — dep qosty ol.

AQSh prezıdenti Donald Tramp senbide Kanadadan energııa ımportyna 10% jáne basqa taýarlarǵa 25% baj salyǵyn engizý týraly Jarlyqqa qol qoıdy. Atalmysh sharalar 4 aqpannan bastap kúshine enedi.

Meksıka prezıdenti Klaýdııa Sheınbaým ekonomıka mınıstrine qorǵanys sharalaryn qamtıtyn «V josparyn» qurýdy tapsyrdy.

— Meksıka qarsylasýdy qalamaıdy. Biz kórshi elder arasyndaǵy yntymaqtastyqtan bastaımyz. Meksıka fentanıldiń AQSh-ta ǵana emes, basqa jerde de bolǵanyn qalamaıdy, — dep qosty ol.

Sonymen birge, Sheınbaým «eger AQSh esirtki satýmen aınalysatyn jáne zorlyq-zombylyq týdyratyn qylmystyq toptarmen kúreskisi kelse» birlesip jumys isteý kerek ekenin atap ótti.

— Osy maqsatta men prezıdent Trampqa Densaýlyq saqtaý jáne qaýipsizdik salasyndaǵy eń jaqsy mamandardan turatyn jumys tobyn qurýdy usynamyn, — dep atap ótti ol.

Sheınbaýmnyń aıtýynsha, problemalar «tarıfterdi engizý arqyly emes, kelissózder men dıalog arqyly sheshiledi».

Osyǵan deıin AQSh prezıdenti Donald Tramp senbi kúni Meksıkaǵa 25 paıyz, Kanadaǵa 25 paıyz, Qytaıǵa 10 paıyzdyq baj salyǵyn engizetini habarlandy.