Kanada memlekettik qyzmetshilerge TikTok-ty paıdalanýǵa tyıym saldy
Kanada bıligi mundaı sheshim shyǵarýyn atalǵan áleýmettik jeliniń memlekettik qyzmetkerler gadjetteriniń qupııalylyǵy men qaýipsizdigin qorǵaý deńgeıiniń tómendigimen baılanystyryp otyr.
Keıbir amerıkalyq jáne eýropalyq zań shyǵarýshylar men sheneýnikter Beıjiń TikTok-ty óz paıdalanýshylary týraly derekter berýge májbúrleýi nemese adamdar kórip otyrǵan beınelerge áser etýi múmkin dep alańdaýshylyq bildirýde.Ótken aptada Eýropalyq komıssııa óz qyzmetkerlerine Tik Tok-ty jumys qurylǵylarynda paıdalanýǵa tyıym saldy. Eýropa óz dırektıvasyn shyǵarǵan kezde, kanadalyq retteýshi organdar platformanyń qupııalylyqty saqtaýyna qatysty tergeýdi bastady.
AQSh-ta federaldy úkimet pen kóptegen shtattar memlekettik qyzmetkerlerge TikTok-ty qurylǵylaryna ornatýǵa tyıym saldy.
Kanadanyń memlekettik qyzmet mınıstri Mona Forteniń aıtýynsha, resmı tulǵalar tekserýden keıin TikTok qosymshasynyń «qupııalylyq pen qaýipsizdik úshin qolaısyz qaýiptilik deńgeıin bildiretinin» anyqtady.
Jaqynda Toronto mańyndaǵy is-sharada Kanada premer-mınıstri Djastın Trıýdo úkimettiń TikTok týraly sheshimi kásipkerler men jeke tulǵalardy «óz derekteriniń qaýipsizdigi týraly oılanýǵa jáne tańdaý jasaýǵa» ıtermeleýi múmkin dep málimdedi.
Apptopia analıtıkalyq kompanııasynyń málimetteri boıynsha, 2022 jyldyń nátıjesine sáıkes Tik Tok álemdegi jáne AQSh-taǵy eń kóp júktelgen qosymshaǵa aınaldy.
