Kanada Qazaqstandaǵy balalar hokkeıin damytýǵa qoldaý kórsetpek
ASTANA. QazAqparat - Búgin Kanada general-gýbernatory Jıýlı Paıet Astanaǵa sapary aıasynda QR Prezıdenti Nursultan Nazarbaevpen kezdesedi. Bul týraly QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.
«3 jeltoqsanda Kanada general-gýbernatory Jıýlı Paıettiń Qazaqstanǵa jumys sapary bastaldy. Keshe Baıqońyr ǵarysh aılaǵynda Jıýlı Paıett kanadalyq ǵaryshker Devıd Sen-Jaktyń Halyqaralyq ǵaryshqa saparyn tamashalady»,- dedi ol.
Resmı ókil dereginshe, búgin Astanada Kanada general-gýbernatorynyń Memleket basshysymen jáne Senat Tóraǵasymen kezdesýleri josparlanýda. Oǵan qosa, Jıýlı Paıett Parlament Senatynyń Halyqaralyq qatynastar, qorǵanys jáne qaýipsizdik komıtetiniń tóraıymy Darıǵa Nazarbaevanyń tóraǵalyǵymen ótetin qazaqstandyq áıel saıasatkerler men kásipkerlerdiń qatysýymen áıelder kóshbasshylyǵy taqyrybyndaǵy dóńgelek ústelge qatysady.
«Jıýlı Paıett jumys saparynyń sońynda, búgin saǵat 16.00-de «Barys Arena» muz saraıynda Kanada tarapynyń Qazaqstandaǵy balalar hokkeıin damytýǵa qoldaý kórsetetinin jarııalaıdy», - dedi Aıbek Smadııarov.
Sonymen qatar, onyń dereginshe, 5 jeltoqsanda Kanada general-gýbernatory Ulttyq ǵarysh ortalyǵyna barady.
«Bul is-shara sońǵy ýaqytta Qazaqstan men Kanada arasynda ǵarysh salasyndaǵy yntymaqtastyqtyń oń perspektıvalaryn kórsetip júrgen damý múmkindikterine nazar aýdarta alady», - dedi ol.
