Kanada áskerı bazasyndaǵy órtten 4 adam opat bolyp, 19 adam hal ústinde jatyr
ASTANA. KAZINFORM — Kanadanyń Alberta provıntsııasyndaǵy Ýeınraıt áskerı bazasynda bolǵan surapyl órtten tórt áskerı qyzmetshi qaza tapty. Taǵy 39 adam aýrýhanada jatyr, onyń 19-ynyń jaǵdaıy aýyr, dep habarlaıdy BBC.
Bılik ókilderiniń málimetinshe, órt bazadan shamamen bir shaqyrym jerde, qurǵaq shóptiń tutanýynan bastalǵan. Udaıy soqqan jelmen órt Edmontonnan shamamen 210 shaqyrymda ornalasqan polıgonǵa jyldam jetken.
Órt bastalǵan kezde bazada jattyǵý ótip jatqan. Edmontonda ornalasqan 1-shi dıvızııanyń komandıri Ýeıd Ratlendtiń aıtýynsha, jyldamdyǵy alǵashynda saǵatyna 50 kılometrden aspaǵan jel órt tutanǵan boıda 96 km/saǵatqa (60 mıl/saǵ) jetken.
Onyń aıtýynsha, jalyn shamamen bir shaqyrymǵa 30-60 sekýndta taraǵan. Bılik qurban bolǵandardyń esimderin jarııalady: serjant Morgan Vong, qatardaǵy jaýynger Shon Farrell, qatardaǵy jaýynger Eıdan Gýldıng jáne qatardaǵy jaýynger Heıden Lıkkemark.
Kanada premer-mınıstri Mark Karnı bul oqıǵany beıbit ýaqytta eldiń qarýly kúshteri bastan keshirgen eń aýyr qaıǵyly oqıǵalardyń biri dep atady.
— Erjúrek áskerı qyzmetshilerdiń qazasyna elimizdiń qabyrǵasyn qaıystyrdy, — dedi Karnı.
Premer-mınıstr qurban bolǵandardyń qurmetine el boıynsha barlyq federaldy ǵımarattardaǵy memlekettik týdy jartylaı tómen túsirýdi buıyrdy.
Alberta premer-mınıstri Danıel Smıt órtten zardap shekkenderdiń kópshiligine birneshe apta nemese aı boıy mamandandyrylǵan, qarqyndy medıtsınalyq kómek qajet bolatynyn málimdedi.
Buǵan deıin Kanadada tikushaq apatqa ushyrap, 4 adam kóz jumǵany belgili boldy.
