Kanada alǵash ret «Eýrovıdenıege» qatysady
ASTANA. KAZINFORM – Kanada 2027 jyly Bolgarııada ótetin «Eýrovıdenıe» halyqaralyq án baıqaýyna alǵash ret qatysady, dep habarlaıdy Deutsche Welle.
Eýropalyq habar taratý odaǵy (EBU) men Kanadanyń ulttyq teleradıo korporatsııasy birlesken málimdemesinde kanadalyq habar taratýshynyń Eýropalyq habar taratý odaǵyna múshe bolǵany jáne osynyń arqasynda eldiń baıqaýǵa qatysý múmkindigine ıe ekeni aıtyldy.
«Kanadanyń «Eýrovıdenıege» degen qyzyǵýshylyǵy men yntasy óte joǵary», – delingen habarlamada.
EBU málimetinshe, 2026 jyly Venada ótken 70-shi «Eýrovıdenıe» baıqaýynda Kanada Eýropadan tys elder arasynda eń kóp daýys bergen úsh memlekettiń qataryna kirgen. Sonymen qatar kanadalyqtar jartylaı fınal men fınalǵa eń kóp bılet satyp alǵan elderdiń biri boldy.
«CBC/Radio-Canada-ny Eurovision Song Contest múshesi retinde qarsy alǵanymyzǵa óte qýanyshtymyz. Bul – Eýropada dúnıege kelgen baıqaýdyń álemge ashyq ekenin kórsetetin taǵy bir dálel», – dedi «Eýrovıdenıeniń» dırektory Martın Grın.
Kanada baıqaýǵa jartylaı fınal kezeńinen bastap qatysady. Eldiń atynan óner kórsetetin oryndaýshyny irikteý týraly tolyq aqparat jyl sońyna deıin jarııalanady.
Aıta keteıik, «Eýrovıdenıe» baıqaýy alǵash ret 1956 jyly uıymdastyryldy. Eýropadan tys alǵashqy turaqty qatysýshy retinde Avstralııa 2015 jyldan beri óner kórsetip keledi. Al 2027 jylǵy baıqaý Bolgarııada ótedi. Bul el 2026 jyly ánshi Daranyń Bangaranga ánimen alǵash ret jeńimpaz atanǵannan keıin baıqaýdy qabyldaý quqyǵyna ıe boldy.
Eske salaıyq, «Evrovıdenıe» daýys berý tártibin ózgertti.
