Kanada AQSh-tyń bolat pen alıýmınıı ónimine qarsy tarıfterin qaıta qarastyrady

ASTANA. KAZINFORM — Kanada Federaldy Úkimeti 21 shildeden bastap AQSh-tan ákelinetin bolat pen alıýmınıı ónimderine qarsy engizilgen tarıfterdi keń aýqymdy saýda kelissózderiniń barysyna sáıkes qaıta qarastyrady, dep habarlaıdy Sınhýa.

Bul týraly beısenbi kúni eldiń Qarjy mınıstrligi málimdedi.

— Úkimet AQSh-pen jańa ekonomıkalyq jáne qaýipsizdik seriktestigi jóninde kelissózder júrgizip jatqanda, biz jumysshylar men óndiristi ádiletsiz ári negizsiz engizilgen amerıkalyq tarıfterden qorǵaımyz. Biz Kanada úshin eń tıimdi kelisimdi jasaýǵa qansha ýaqyt qajet bolsa, sonsha ýaqyt jumsaımyz, — delingen Premer-mınıstr Mark Karnıdiń málimdemesinde. 

Aıta keteıik, aqpanda AQSh prezıdenti Donald Tramp barlyq bolat pen alıýmınıı ımportyna 25 paıyzdyq baj salyǵyn engizetinin málimdedi.

11 aqpanda Tramp alıýmınıı men bolat ımportyna 25% baj salyǵyn engizgenin jarııa etti. Shetelden ákelinetin bolat pen alıýmınııdiń barlyq ımportyna, shyqqan eline qaramastan, baj salyǵy salynatyny aıtyldy.

Al maýsym aıynyń basynda Donald Tramp bolat pen alıýmınııge salynatyn baj salyǵyn 25%-dan 50%-ǵa deıin arttyrý týraly Jarlyqqa qol qoıǵany belgili boldy.