Kanada AQSh taýarlaryna qarsy baj salyǵyn engizedi

ASTANA. KAZINFORM – Kanada premer-mınıstri Djastın Trıýdo Tramp ákimshiliginiń tarıfteri seısenbi kúni kúshine enetin bolsa amerıkalyq taýarlarǵa baj salyǵyn engizetinin málimdedi, dep habarlaıdy CNBC.

Kanada premer-mınıstri Djastın Trıýdo dúısenbi kúni málimdegendeı, Kanada amerıkalyq taýarlarǵa, jalpy quny 155 mıllıard kanadalyq dollar (107 mıllıard AQSh dollaryn) bolatyn ónimderge 25 paıyzdyq baj salyǵyn engizedi. Bul shara AQSh-tyń kanadalyq taýarlarǵa engizgen tarıfterine jaýap retinde qabyldanady.

Jaýap retinde qoldanylatyn sharalar eki kezeńde júzege asyrylady. Djastın Trıýdonyń túsindirýinshe, seısenbiden bastap Kanada amerıkalyq taýarlarǵa, jalpy quny 30 mıllıard kanadalyq dollar bolatyn ónimderge 25 paıyzdyq baj salyǵyn engizedi, al qalǵan 125 mıllıard kanadalyq dollar kólemindegi taýarlarǵa salynatyn baj salyǵy 21 kúnnen keıin kúshine enedi.

— Bizdiń tarıfterimiz AQSh-tyń saýda sanktsııalary joıylmaıynsha saqtalady, al eger AQSh tarıfteri joıylmasa, biz birqatar tarıftik emes sharany qabyldaý úshin provıntsııalar men aýmaqtarmen belsendi jáne turaqty kelissózder júrgizemiz, — dep qosty Djastın Trıýdo.

Buǵan deıin AQSh prezıdenti Donald Tramp dúısenbide Meksıka men Kanadaǵa 25 paıyzdyq baj salyǵy 4 naýryz, seısenbi kúni kúshine enetinin málimdedi.