Kanada AQSh taýarlaryna 50%-ǵa deıin baj salyǵyn engizdi
ASTANA. KAZINFORM — Kanada 8 qyrkúıekten bastap AQSh-tyń birqatar taýaryna qarymta baj salyǵyn engizdi. Bul Ottava men Vashıngton arasyndaǵy saýda teketiresin odan ári ýshyqtyrdy, dep habarlaıdy Kazinform agenttigi The Guardian-ǵa silteme jasap.
Kanada engizgen qarymta tarıfter AQSh-tan ákelinetin quny 20 mlrd dollarlyq taýarlardy qamtıdy. Bul taýarlarǵa 15%-dan 50%-ǵa deıin baj salyǵy salynady.
Jańa tarıfter AQSh-tan ákelinetin birqatar taýarǵa engizildi. Olardyń ishinde bolat pen alıýmınıı, irimshik, turmystyq tehnıka, kıim-keshek, kosmetıka jáne aýyl sharýashylyǵy jabdyqtary bar.
— Bul qarymta baj salyqtary AQSh-tyń Kanadanyń 20 mıllıard dollarlyq taýarlaryna 50 paıyzdyq baj salyǵyn engizý týraly sheshimine jaýap retinde qabyldandy, — dep málimdedi Kanada úkimeti.
Vashıngtonda birneshe kúnge sozylǵan kelissózder 21 tamyzda sátsiz aıaqtaldy. Artynsha AQSh prezıdenti Donald Tramp Kanadadan ımporttalatyn avtomobılder men shıkizatqa 50 paıyzdyq jańa tarıf engizetinin jarııalady. Tramp Ottavany AQSh-ty kóp jyl boıy aldap keldi dep aıyptady.
Sodan beri eki el arasyndaǵy shıelenis odan ári ýshyǵa tústi. Ótken aptada Kanada premer-mınıstri Mark Karnı Tramp ákimshiligin bul máselege baıyppen qaraýǵa shaqyrdy. Óıtkeni saýda daýy barǵan saıyn keń aýqymdy dıplomatııalyq kelispeýshilikterge ulasyp barady.
Tramp Bombardier ónimderin AQSh-ta satýǵa tyıym salatynyn aıtyp, ses kórsetti.
7 qyrkúıekte AQSh prezıdenti Donald Tramp Kvebekte ornalasqan kanadalyq Bombardier Aviation kompanııasyna talap qoıdy. Onyń aıtýynsha, kompanııa ushaq óndirisin AQSh-qa kóshirmegen jaǵdaıda, amerıkalyq naryqtaǵy qyzmetine shekteý qoıylýy múmkin.
— AQSh-ta Bombardier ushaqtaryn satýǵa budan bylaı jol joq! — dep jazdy bas áriptermen Tramp Truth Social áleýmettik jelisindegi paraqshasynda.
Eki el arasyndaǵy shıelenistiń kúsheıýi AQSh, Meksıka jáne Kanada arasyndaǵy erkin saýda jónindegi keń aýqymdy kelisimniń bolashaǵyna qatysty alańdaýshylyq týǵyzdy. Donald Tramp kelisimdi taǵy on jylǵa uzartýdan bas tartqan soń, qujat jyl saıyn qaıta qaralatyn boldy.
Eske sala keteıik, tamyz aıynyń sońynda Vashıngton men Ottava arasyndaǵy saýda soǵysy shıelenisken tusta Donald Tramp AQSh pen Kanada shekarasynda ornalasqan Ontarıo kóliniń ataýyn «Amerıka kóli» dep ózgertý týraly jarlyqqa qol qoıdy.
