Qan obyryna shaldyqqan tanymal jýrnalıstiń qyzy elden kómek surady
ALMATY. QazAqparat - Almatyda qan qaterli isigine shaldyqqan belgili jýrnalıst, «Habar» arnasynyń sport kommentatory Galına Polevaıanyń qyzy Anastasııa Vylegjanına anasynyń emi úshin búkil halyqtan kómek surady, dep habarlaıdy QazAqparat tilshisi.
Galına Polevaıa qaterli isikke shaldyqqanyn 2017 jyly bilgen. Dárigerler áıelge kópdeńgeıli mıoma degen dıagnoz qoıdy.
«Meniń anam qazir óte aýyr jaǵdaıda. 2017 jyl biz úshin óte qıyn jyl boldy. Anamnyń aýrýyn kópshilikten qupııa ustadyq. Anam - men úshin ómirimdegi eń qymbat jan. Ol «Habar» arnasynda 20 jyl boıy qyzmet etken. 15 jylynda jańalyqtar bóliminde sport jańalyqtaryn tikeleı efırde habarlap otyrdy. Qazir búkil otbasymyzben halyqtan kómek suraýǵa májbúrmiz», - dedi A.Vylegjanına.
Onyń aıtýynsha, qaıǵyly jańalyqtan soń 10 aqpanda Galına Polevaıanyń omyrtqa tusyndaǵy qaterli isik alynyp tastalǵan. Bir aıdan soń áıel respýblıkalyq onkologııa aýrýhanasynda emdelýdi bastap ketti.
«Osy ýaqytqa deıin anam hımıoterapııa alyp keledi. Kópke deıin júre almady. Otadan 4 aı ótkende ǵana baldaqpen tura bastady. 6 kýrstan keıingi 8 aılyq remıssııadan soń dárigerler 2 jylda hımıoterapııany toqtatamyz degen. Biraq bıyl jazda isik qaıta óse bastaǵany anyqtaldy», - deıdi jýrnalıstiń qyzy.
Otbasynyń saýalyna álemdik damyǵan klınıka ókilderi «julyndy aýystyrýdan basqa amal joq» degen.
Al Qazaqstanda 50 jasqa deıingi adamdardyń ǵana julynyn aýystyratyn bolyp shyqty.
«Ońtústik Koreıa mamandary kómektesemiz dep otyr. Biraq emdeý quny 286 350 AQSh dollaryna baǵalandy. Sondyqtan, barlyq qazaqstandyqtardan kómek suraýǵa májbúrmiz», - dedi A.Vylegjanına.
Qazirgi tańda Galına Polevaıanyń dostary men áriptesteri kómek qolyn sozyp jatyr. Bireýler aqshalaı kómek berse, keıbireýler aqparattyq qoldaý kórsetýde.
Otbasyna kómek kórsetem degen azamattar bolsa, tómendegi rekvızıtter arqyly qarjy jibere alady
Halyk bank (tg): 4390 8722 0191 7707
Kaspi Gold (tg): 5169 4931 6910 9462
Sberbank ($): 5392 1500 0135 2044
