Qan quıý salasynda Qazaqstan Frantsııadan ozdy
ASTANA. QazAqparat - Halyqaralyq qan quıý qoǵamynyń prezıdenti Revı Reddı Qazaqstanda transfýzıologııanyń damýyna óziniń sarapshylyq baǵalaýyn berdi, dep habarlaıdy QazAqparat.
«Medıtsına salasynda Qazaqstannyń eki jetistigine zor qurmetpen qaraımyn, ıaǵnı postkeńestik keńistikte alǵash ret ınfektsııa skrınınginiń avtomattandyrylǵan eki deńgeıli júıesi engizildi. Bul júıe óte biregeı ári patogenderdi anyqtaýǵa kómektesedi», - dedi ol Astanadaǵy «Qannyń óteýsiz erikti donorlyǵyn damytýdyń ózekti máseleleri» atty ІІІ Eýrazııalyq kongreste.
Sonymen qatar Reddı elimizdiń ekinshi jetistigi retinde otandyq qan qyzmetiniń jumysyn atap ótti. Bul rette joǵary sapada qan komponentterin bólý protsesine qatysty jańa tehnologııalardyń orny erekshe bolyp otyr.
«Qazaqstan patogen-redýtsentterin berýdi engizgen úshinshi el, Sizderge deıin Shveıtsarııa men Belgııa boldy. Sodan keıin osy klýbqa Frantsııa qosyldy. Bul óz kezeginde mańyzdy, sebebi joǵary sapadaǵy qan komponentterine zárý naýqastar kóptep kezdesedi», - dedi halyqaralyq sarapshy.
Sonymen qatar R. Reddı Qazaqstanǵa alǵash kelip otyrǵanyn aıta kele, donorlyqty damytý barsha álem úshin ózekti taqyryp ekenin jetkizdi.
«Densaýlyq jaǵdaıy jaqsy barlyq adamdar qan tapsyrýy kerek. Sebebi naýqastar osyndaı kómekke muqtaj», - dedi ISBT basshysy.
Transfýzıologtar kongresi Astanada 4-7 sáýir aralyǵynda ótedi. Bul sharaǵa qatysý úshin Qazaqstanǵa halyqaralyq uıymdardyń ókilderi, Ulybrıtanııa, Ispanııa, AQSh, Germanııa, Japonııa jáne Reseıdiń aldyńǵy qatarly transfýzıologtary keldi.
