Qan donorlaryna aqshalaı ótemaqy kólemi ulǵaıtyla ma
ASTANA. KAZINFORM — Qarjy mınıstri Mádı Tákıev Májilis depýtattarynyń qan donorlaryna aqshalaı ótemaqyny 0,25 AEK-ten 1-1,25 AEK-ke deıin ulǵaıtý jáne Qurmetti donor mártebesin qalpyna keltirý usynysyn jaýap berdi.
— 2026-2028 jyldarǵa arnalǵan respýblıkalyq bıýdjette Densaýlyq saqtaý mınıstrligine TMKKK aıasynda qan donorlaryna 0,25 AEK mólsherinde aqshalaı ótemaqyǵa 809,8 mln teńge (2026 jyly — 257,8 mln teńge, 2027 jyly — 274,2 mln teńge, 2028 jyl — 277,8 mln teńge) somasynda shyǵys kózdelgen. Qan donorlaryna aqshalaı ótemaqy mólsherin ulǵaıtý jáne Qurmetti donor mártebesin qalpyna keltirý respýblıkalyq bıýdjetten qosymsha shyǵystar bólýdi talap etedi, — dedi mınıstr depýtattyq saýalǵa bergen jaýabynda.
Onyń málimetinshe, «Halyq densaýlyǵy jáne densaýlyq saqtaý júıesi týraly» kodekske sáıkes oblystardyń, respýblıkalyq mańyzy bar qalalardyń jáne astananyń jergilikti ókildi organdary donorlarǵa qosymsha kótermeleý berý týraly sheshim qabyldaıdy. Sondaı-aq oblystardyń, respýblıkalyq mańyzy bar qalalardyń jáne astananyń jergilikti atqarýshy organdary qan men onyń komponentteriniń erikti óteýsiz donorlyǵyn damytý jónindegi sharalardy iske asyrýdy qamtamasyz etedi.
— Sonymen birge, respýblıkalyq jáne jergilikti bıýdjetterdiń shyǵystaryn ońtaılandyrý jáne olarǵa basymdyq berý maqsatynda 2028 jylǵy 31 jeltoqsanǵa deıin respýblıkalyq jáne jergilikti bıýdjetterdiń shyǵystaryn josparlaý kezinde áleýmettik saladaǵy jańa bastamalarǵa bıýdjet qarajatyn bólýge moratorıı engizilgendigin atap ótemiz. Osyǵan baılanysty, mınıstrlik DSM-ge múddeli memlekettik organdarmen birlesip qan donorlaryn kótermeleýdiń materıaldyq emes sharalaryn usyný múmkindigin qarastyrýdy usyndy. Baıandalǵannyń negizinde, qan donorlyǵyn damytý jónindegi depýtattardyń usynystary DSM-niń múddeli memlekettik organdarmen jáne jergilikti atqarýshy organdarmen birlesip qaraýyn talap etedi, — dedi Mádı Tákıev.
Buǵan deıin Densaýlyq saqtaý mınıstrligi 2028 jylǵa deıin qan donorlyǵyn damytý jónindegi is-sharalar josparyn ázirlep jatqanyn jazǵan edik.
