Qan aınalymy aýrýlarynan bolatyn ólim kórsetkishi 20 paıyzǵa tómendedi - S. Qaıyrbekova
ASTANA. 20 aqpan. QazAqparat - Elimizde sońǵy jyldary qan aınalymy aýrýlarynan bolatyn ólim kórsetkishi 20 paıyzǵa tómendedi.
Búgin QR Parlamenti Májilisinde ótken Úkimet saǵatynda Densaýlyq saqtaý mınıstri Salıdat Qaıyrbekova osylaı málim etti.
Óz sózinde vedomstvo basshysy elimizde júrek-qan tamyry aýrýlaryn emdeýde jańa tehnologııalar engizilgenin aıtyp, buǵan deıin qoljetimsiz bolyp kelgen - tek shet elderde jasalatyn operatsııalardyń elimizde júzege asa bastaǵanyna toqtalyp ótti.
«2011 jyly júrekke qatysty 8 myńnan astam operatsııa júrgizilse, sonyń 6,5 myńy júrekke ashyq jasaldy. Budan bólek, Memleket basshysynyń tapsyrmasy boıynsha Astanada álemdik deńgeıdegi Ulttyq kardıohırýrgııalyq ǵylymı ortalyq ashyldy. Ótken 4 aıdyń ishinde ǵana osy ortalyqta 600 kardıohırýrgııalyq operatsııa, onyń ishinde balalarǵa 119 ota jasaldy. Buǵan deıin osy sanattaǵy naýqastar shet elderge jiberiletin edi», - deıdi S. Qaıyrbekova.
Mınıstrdiń aıtýynsha, asqynǵan ınsýlt aýrýlaryn halyqaralyq standarttar boıynsha emdeý úshin óńirlerde 8 ınsýlt-ortalyqtary ashyldy. 20-dan astam maman shet elderde biliktiligin jetildirdi.
«Jalpy atqarylǵan sharalar nátıjesinde qan aınalymy júıesi aýrýlarynan bolatyn ólim elimizde 20 paıyzǵa tómendep otyr. Biz aldaǵy ýaqytta bul kórsetkishti taǵy 20 paıyzǵa jaqsartýdy mindet etemiz. Al bul jalpy halyqtyń ómir súrý jasyn uzartyp,osy sanattaǵy naýqastardyń ómir sapasyna jaǵymdy áser beretin bolady», - deıdi S. Qaıyrbekova.
