Qamshybek Qońqabaev WBO reıtıngisi boıynsha úzdik úshtikke endi

ASTANA. QazAqparat – Dúnıejúzilik boks qaýymdastyǵy (WTA) barlyq salmaq dárejesindegi boksshylardyń reıtıngisin jańartty, dep habarlaıdy QazAqparat tilshisi «Sports.kz» saıtyna silteme jasap.

Oǵan sáıkes, asa aýyr salmaq dárejesindegi bylǵyry qolǵap sheberleri arasynda qazaqstandyq Jan Kosobýtskıı toǵyzynshy pozıtsııadan segizinshi orynǵa kóterildi. Al Ivan Dychko buǵan deıin turaqtaǵan 15-shi ornyn saqtap qaldy. Bul salmaqta «Sýperchempıondyq» ataq Aleksandr Ýsıktiń enshisinde bolsa, reıtınginiń alǵashqy úshtigine kongolyq sportshy Martın Bakole, amerıkalyq Maıkl Hanter men Deonteı Ýaılder endi.

Sonymen qatar, brinshi aýyr salmaq boıynsha bul ýaqytqa deıin reıtıngide tórtinshi pozıtsııada bolǵan el sportshysy Qamshybek Qonqabaev úshinshi orynǵa kóterildi. Onyń aldynda kýbalyq Ronıel Dortıkos pen shvetsııalyq Bad Djek tur.

Al ekinshi orta salmaqta óner kórsetetin Aıdos Erbosynuly besinshi orynǵa syrǵydy. Ol buǵan deıin atalǵan salmaq dárejesinde kósh bastap turǵan edi. Sondaı-aq, qazaqstandyq kásipqoı boksshy Bek Nurmaǵanbet reıtıngide bir satyǵa tómendedi. Atap aıtqanda, ol onynshy orynnan on birinshi orynǵa syrǵydy.

Ekinshi jartylaı jeńil salmaq dárejesinde óner kórsetetin el boksshysy Sultan Zaýrbek bul ýaqytqa deıin turaqtaǵan segizinshi orynda qaldy. Reıtınginiń úzdik úshtigine amerıkalyq Lamont Kraých, grýzın boksshysy Otar Eranosıan jáne ırlandııalyq Djon Kerroll kirdi.