Qamshybek Qońqabaev WBA tıtýly úshin jekpe-jek ótkizedi
NUR-SULTAN. QazAqparat - Aýyr salmaqtaǵy qazaqstandyq boksshy Qamshybek Qońqabaevtyń (4-0, 3KO) kelesi qarsylasy belgili boldy. QazAqparat bul týraly áleýmettik jelidegi «Qazaqstannyń kásipqoı boksy» paraqshasyna silteme jasap habarlaıdy.
25 naýryzda Tokıo Olımpıadasynyń qola júldegeri jáne áýesqoılar arasyndaǵy Álem chempıonatynyń eki dúrkin kúmis júldegeri Qamshybek Qońqabaev Djonnı Mıýller (23-9-2, 14KO) esimdi ońtústik afrıkalyq boksshymen kezdesedi.
Ońtústik afrıkalyq atlet 2009 jyldan beri kásipqoı rıngte óner kórsetip keledi. Ol barlyq jekpe-jegin óz elinde ótkizgen, shet memleketterde úsh ret aıqasqan. Sonyń ishinde 2015 jyly Ýkraınada Aleksandr Ýsıkpen (12 raýndtyq jekpe-jektiń 3-raýndynda nokaýtpen jeńilgen) kezdesti. 2014 jyly ol WBC International Silver tıtýlyna ıe boldy.
Qońqabaev pen Mıýller jekpe-jeginde WBA Gold beldigi sarapqa salynady.
