Qamshybek Qońqabaev profıdegi ekinshi jeńisinen keıin álemdik reıtıngide kóterildi

NUR-SULTAN. QazAqparat – Qazaqstandyq boksshy Qamshybek Qońqabaev (2-0, 2 KO) kásipqoı rıngtegi ekinshi jeńisinen keıin Boxrec.com portalynda reıtıngin jaqsartty, dep habarlaıdy QazAqparat Sports.kz saıtyna silteme jasap.

Qońqabaev birinshi aýyr salmaq reıtınginde 74-shi orynnan 51-ge kóterildi.

Keshe Qamshybek Ýkraına boksshysy Sergeı Radchenkony (7-7, 2 KO) tórtinshi raýndta nokaýtqa jibergen bolatyn.

Eske sala keteıik, Qamshybek Qońqabaevtyń kásipqoı rıngtegi alǵashqy jekpe-jegi bıylǵy tamyz aıynda qazaqstandyq Isa Aqberbaevqa (20-2, 15 KO) qarsy ótken edi. Ol Isany nokaýtqa túsirip, jeńiske jetti.

Qońqabaevtyń áýesqoılar boksyndaǵy aıqastaryna kelsek, ol Qazaqstan quramasynyń kapıtany bolyp, álem jáne Azııa chempıonattarynda eki ret kúmis júlde alǵan.