Qamshybek Qońqabaev profı boksta ekinshi ret jeńiske jetti

NUR-SULTAN. QazAqparat - Qazaqstandyq boksshy Qamshybek Qońqabaev (1-0, 1 KO) kásipqoı rıngtegi ekinshi jekpe-jegin ótkizdi, dep habarlaıdy QazAqparat Sports.kz resýrsyna silteme jasap.

Ol ýkraınalyq Sergeı Radchenkomen (7-6, 2 KO) qolǵap túıistirdi.

Sýper aýyr salmaqtaǵy aıqas segiz raýnd dep belgilengen bolatyn. Biraq ol tórt raýndtan keıin toqtady. Sebebi, tórtinshi raýndta Radchenko nokdaýnǵa túsip qaldy. Sondyqtan jekpe-jekti ármen qaraı jalǵastyrýdan bas tartty.

Osylaısha Qamshybek Qońqabaev qarsylasyn tehnıkalyq nokaýtpen jeńip ketti.

Bul - Qamshybektiń kásipqoı rıngtegi ekinshi jeńisi. Ekeýin de nokaýtpen utqan.

Eske sala keteıik, qazaqstandyq bylǵary qolǵap sheberi Qamshybek Qońqabaev kásipqoı bokstaǵy alǵashqy jekpe-jegin bıylǵy tamyz aıynda Isa Akberbaevqa qarsy ótkizgen edi. Ol qarsylasynan basym tústi.

Qamshybek 2017, 2019 jyldary álem, sol jyldarda Azııa chempıony ataǵyn ıelendi. Tokıo Olımpıadasyna joldama jeńip aldy. Kásipqoı boksta jekpe-jek ótkizgenine qaramastan ol atalǵan dúbirli dodada baq synaý múmkindigin joǵaltqan joq.