Qamshybek Qońqabaev: Olımpıadalyq aýylda barlyq qaýipsizdik talaptary saqtalǵan

NUR-SULTAN. QazAqparat – Bokstan Qazaqstan komandasynyń múshesi ári komandanyń tý ustaýshysy Qamshybek Qońqabaev Tokıo Olımpıadasy qarsańynda óz oıymen bólisti. Boksshy olımpıadalyq aýyldaǵy uıymdastyrý deńgeıi joǵary ekenin alǵa tartty dep jazady Olympic.kz.

«Kópten kútken Tokıo Olımpıadasynyń da bastalýyna sanaýly kúnder qaldy. Búginde Qazaqstan komandasy Japonııa jerine taban tiredi. Munda koronavırýsty ınfektsııaǵa baılanysty tyıym óte kóp. Erejelerdiń barlyǵyn saqtap júrmiz. Birneshe ret PTR test tapsyryp, denimizdiń saý ekenin qaıta-qaıta dáleldeýge mindettimiz. Qaýipsizdikti saqtaý úshin kóp kóńil bólinýde. Qazirgideı pandemııa jaǵdaıynda bul óte durys qadam dep esepteımin.

Keshe komandanyń alǵashqy jattyǵýy ótti. Bári de kóńilden shyǵady, bári de joǵary deńgeıde. Kóńil-kúıimiz de tamasha. Bapkerler bizdi bul dodaǵa jaqsy daıyndady. Osy oraıda, barsha qazaqstandyq jankúıerlerdi bizdiń komandany qoldaýǵa shaqyramyn. Sizderdiń qoldaýlaryńyz mundaı mańyzdy sátte asa qajet», - deıdi bokstan komanda kapıtany Qamshybek Qońqabaev.