Qamshybek Qońqabaev Olımpıadadaǵy basty qarsylasyn atady

NUR-SULTAN. QazAqparat – Tokıo Olımpıadasynda Qazaqstannyń namysyn asa aýyr samaqta qorǵaıtyn Qamshybek Qońqabaev basty qarsylastary týraly pikir bildirdi, dep habarlaıdy QazAqparat.

«Birinshiden, bir ǵana ózbek boksshysy emes, odan bólek 15 qarsylas bar. Sondyqtan árqaısysy óte qaýipti. Qudaı qalasa, Olımpıadada ózbek boksshysymen kezdesip jatsaq, bul joly jeńiske jetemiz degen senimimiz bar. Bas bapkerimiz Ǵalymbek Qalıuly men jeke bapkerlerim bar. Taktıka daıyndadyq. Buıyrtsa esemdi qaıtaramyn degen maqsat qoıyp otyrmyn», - dedi sportshy.

Eske salsaq, Dýbaıda ótken Azııa chempıonatynda Qamshybek Qońqabaev ózbekstandyq ejelgi qarsylasy Bahadúr Jalolovpen kezdesip, 0:5 esebimen utylǵan bolatyn.

Qamshybek Qońqabaev bul Olımpıadaǵa Qazaqstannyń týyn ustaıtyn eki sportshynyń biri ekenin aıtý kerek.

Búgin Tokıo Olımpıadasyna baratyn sportshylarmen kezdesken Prezıdent Qasym-Jomart Toqaev Qazaqstan Respýblıkasynyń Memlekettik Týyn alǵash ret eki birdeı tý ustaýshyǵa – jeńil atletıkadan Olımpıada chempıony Olga Rypakova men bokstan álem chempıonatynyń kúmis júldegeri Qamshybek Qońqabaevqa tabystady.