Qamshybek Qońqabaev Magomedrasýl Mejıdovten utyldy
ASTANA. QazAqparat - Germanııanyń Gambýrg qalasynda ótip jatqan bokstan álem chempıonatynda asa aýyr salmaqtaǵy boksshymyz Qamshybek Qońqabaev kúmis júldeger atandy, dep habarlaıdy QazAqparat.
Boksshymyz álem chempıonatynyń fınaldyq kezdesýinde ázerbaıjandyq Magomedrasýl Mejıdovpen judyryqtasqan bolatyn. Tóreshiler 4-1 esebimen jeńisti ázerbaıjandyq boksshyǵa berdi.
Buǵan deıin 56 keli salmaq sanatynda jarys jolyna shyqqan boksshymyz Qaırat Eralıev amerıkalyq Dıýk Ragandy utyp, álem chempıony atanǵanyn habarlaǵan bolatynbyz.
Odan keıin sharshy alańǵa kóterilgen Ábilhan Amanqul Eýropa chempıony ýkraınalyq Aleksandr Hıjnıakpen álem chempıony ataǵy úshin judyryqtasyp,jeńilip qaldy.
Aıta keteıik, osyǵan deıin Gambýrgtegi álem chempıonatynda Jomart Erjan (49 keli), Vasılıı Levıt (81 keli) pen Abylaıhan Júsipov (69 keli) qola júldeger atanǵan edi. Osylaısha Qazaqstan boksshylary álem chempıonatyn 1 altyn, 2 kúmis jáne 3 qola medalmen aıaqtady.
