Qamshybek Qońqabaev bir jekpe-jek ótkizip, Olımpıadaǵa joldama aldy

NUR-SULTAN. QazAqparat – Búgin Iordanııanyń Amman qalasynda ótip jatqan bokstan Olımpıadaǵa irikteý týrnırinde taǵy bir boksshymyz jartylaı fınalǵa shyǵyp qana qoımaı, Tokıo Olımpıadasyna joldama jeńip aldy, dep habarlaıdy QazAqparat tilshisi.

Asa aýyr salmaqta (+91) synǵa túsken Qamshybek Qońqabaev jarysty birden shırek fınaldan bastaǵan bolatyn. Ol alǵashqy aıqasynda qytaılyq Maımaııtı Aemaııtıdi aıqyn basymdylyqpen utyp, jartylaı fınalǵa shyqty. Sondaı-aq, Olımpıada oıyndarynyń joldamasyn qanjyǵasyna baılady.

Bul Ǵalymbek Kenjebaev baptaıtyn erler quramasynyń Olımpıadaǵa jeńip alǵan besinshi joldamasy.

Esterińizge sala keteıik, osyǵan deıin 69 keli salmaqta Abylaıhan Júsipov, 81 keli salmaqta Bekzat Nurdáýletov, 91 keli salmaqta Vasılıı Levıt , 75 keli salmaqta Ábilhan Amanqul Tokıo Olımpıadasyna joldama jeńip alǵan bolatyn. Sondaı-aq, áıelder quramasynan 75 kelide qazaqstandyq boksshy Nadejda Rıabets te Tokıo Olımpıadasyna lıtsenzııa utyp aldy.

Osylaısha búgin bir kúnde qazaqstandyq boksshylar el qorjynyna birden Olımpıada oıyndarynyń 6 lıtsenzııasyn syılady.