Qamshy-sert: Qyz Jibek fılmindegi epızod sýretshi qylqalamyna arqaý boldy
ASTANA. QazAqparat - Astanada daıyn týyndylardy ǵana emes, olardyń daıyndalý kezeńderin de kórsetetin erekshe kórme ashyldy, dep habarlaıdy «QazAqparat» HAA tilshisi.
Atap aıtqanda, QR Tuńǵysh Prezıdenti - Elbasy kitaphanasynyń mýzeıinde sýretshi, QR Sýretshiler odaǵynyń múshesi Ádilǵalı Baıandınniń «Sýretshi kózimen» atty shyǵarmashylyq kórmesi kórermen nazaryna usynyldy.
«Kórmeni uıymdastyrýǵa bir jyl boıy daıyndaldyq. Ózge kórmelerge uqsamaıtyn erekshe bolǵanyn qaladym. Onyń basty ózgesheligi - tek daıyn týyndylardy ǵana emes, sýrettemesin, nobaıyn, jobasyn, kompozıtsııasyn usyndym. Óner súıer qaýymǵa sýret salý protsesterin de kórsetkim keldi», - deıdi sýretshi.
Onyń aıtýynsha, qazaqı qundylyqtardy pash etetin kórmege 50-ge tarta kartına qoıylǵan.
«Qyz Jibek» fılminde eki jas ońasha qalǵanda, aralaryna qamshy qoıatyn epızod bar. Qamshynyń nelikten qoıylǵany týraly oılanyp kórdińizder me? Ol qamshy-sert dep atalady. Eger qamshy-sertten jigit attasa jigit opasyz, qyz attar bolsa - óz sertin buzǵany. Ata-babamyzdyń sertke beriktigin «Qamshy» atty týyndymda beıneledim», - dep túsindirdi Ádilǵalı Baıandın.
Sýretshi atap ótkendeı, bul ónerdiń basty qasıeti - aýdarmashyǵa muqtajdyqtyń bolmaýynda. ıAǵnı, qylqalam sheberleriniń qııalynan týyndaǵan sýretterdi kez kelgen ult ókili túsine alady.
«On jyldyq tarıhy bar Elbasy kitaphanasynda jańa múmkindikterge jol ashyldy. Seriktestik jobasy aıasynda Ádilǵalı Baıandın sııaqty elimizge tanymal sýretshilerdiń týyndylaryn jurtshylyqqa tanystyryp jatyrmyz. Búgingi keshtiń basty keıipkeri táýelsizdik tarıhyn óz kózimen kórip, oǵan óz úlesin qosqan atpal azamattarymyzdyń biri desem artyq aıtqanym emes. Kórkem týyndylarynda avtor alyp batyrlar tulǵasyn, ańshylar, qusbegiler, kúıshiler men aqyndar, kóshpendiler úrdisin kórsetetin syrly álemdi beıneleıdi. Máselen, Ádilǵalı Baıandın «Kótibar», «Qobylandy», «Taılaq batyr» atty kitaptardyń ıllıýstratsııasynyń avtory, «Kótibar batyr» jáne «Bekqulıe» mazarlary jobasyn jasaǵan», - dep atap ótti QR Tuńǵysh Prezıdenti - Elbasy kitaphanasy dırektorynyń orynbasary Kúláısha Aqtaeva.
Dırektordyń orynbasarynyń aıtýynsha, atalǵan jumystardy sýretshi arnaıy osy zal úshin ázirlegen. Sondaı-aq, dál osy zalda kezinde Elbasynyń qurmetti qonaqtardy qabyldaǵanyn tilge tıek etti.
Aıta keteıik, «Sýretshi kózimen» kórmesi 2017 jyldyń 17 qarashasyna deıin jalǵasady. Kirý - tegin.
