Qamshybek Qońqabaevtyń Anglııadaǵy jekpe-jegi qaı kúni ótetini aıtyldy
ASTANA. KAZINFORM – Qazaqstandyq boksshy Qamshybek Qońqabaevtyń Anglııada ótetin kásibı jekpe-jeginiń kúni belgili boldy, dep habarlaıdy Sports.kz.
BoxRec júıesiniń málimetine sáıkes, qazaqstandyq aýyr salmaqtaǵy boksshynyń alty raýndqa josparlanǵan jekpe-jegi 2026 jylǵy 24 mamyrda Anglııanyń Farnýort (Bolton) qalasyndaǵy The Hideout sport arenasynda ótedi.
Qarsylasy ázirge resmı túrde jarııalanǵan joq.
Bul Qońqabaevtyń uzaq úzilisten keıingi alǵashqy jekpe-jegi bolmaq. Onyń kásipqoı bokstaǵy sońǵy aıqasy 2022 jylǵy 25 naýryzda Almatyda ótken. Sol kezdesýde ol ózbekstandyq Farrýh Djýraevty ekinshi raýndta tehnıkalyq nokaýtpen jeńgen.
Qazirgi ýaqytta boksshy Londonda oqý-jattyǵý jıynyn ótkizip, Leo’s Gym zalynda daıyndalyp jatyr.
Aıta keteıik, Qamshybek Qońqabaev Tokıo-2020 Olımpıadasy oıyndarynyń qola júldegeri.
Sonymen qatar onyń qorjynynda álem chempıonattarynyń eki kúmis medali (2017, 2019) jáne Azııa chempıonattarynyń tórt kúmisi (2017, 2019, 2021, 2022) bar.
Ótken jyly qańtarda Qamshybek Qońqabaev kásibı mansabyn aıaqtaǵany habarlanǵan bolatyn.
