Qamqorshylyq organdary qyzmetkerleriniń sany 47% artty
ASTANA. KAZINFORM - QR Oqý-aǵartý mınıstrligi Balalardyń quqyqtaryn qorǵaý komıtetiniń málimetinshe jyl basynan beri qamqorshylyq organdary qyzmetkerleriniń shtat sany 47%-ǵa artty. Bul jetim jáne ata-anasynyń qamqorlyǵynsyz qalǵan balalardyń ómir súrý jaǵdaılaryn júıeli tekserýge múmkindik beredi.
Komıtet tóraǵasynyń aıtýynsha, qorǵanshylyq jáne qamqorshylyq organdary qyzmetkerleriniń sanyn arttyrý balalardyń quqyqtaryn qorǵaý júıesiniń sapasyn jaqsartýǵa yqpal etedi.
«Qyzmetkerlerdiń kásibıligi men óz jumysyna jaýapkershilikpen qaraýynyń arqasynda biz ár balanyń quqyǵynyń qorǵalýyna jáne ózin qaýipsiz sezinýine jaǵdaı jasaımyz. Bul balalardyń ómir súrý sapasyn jaqsartyp qana qoımaı, olardyń quqyqtaryn qorǵaýdyń búkil júıesin nyǵaıta otyryp, bolashaǵyn jarqyn etedi», - deıdi Nasymjan Ospanova.
Aıta keteıik, jyl basynan beri patronattyq tárbıedegi 17 660 jetim balanyń ómir súrý jaǵdaıy tekserildi. Turmystyq jaǵdaıyna, balalardyń densaýlyǵyna, fızıkalyq jáne emotsıonaldyq damýyna, sondaı-aq otbasylyq qarym-qatynastarǵa erekshe nazar aýdaryldy.
Tekserý qorytyndysy boıynsha qamqorshylar men qorǵanshylardyń qyzmetin odan ári baqylaý boıynsha usynymdar berildi. Bul sharalar qorǵanshylyq pen qamqorshylyq júıesin ári qaraı jetildirýge, qorǵaý men qoldaýǵa muqtaj balalardyń balalyq shaǵy men bolashaǵyn laıyqty qamtamasyz etýge yqpal etedi.
