«Qamqorlyq» jobasy aıasynda Qazyǵurt aýdanynda 20 otbasy úıli bolady
TÚRKІSTAN OBLYSY. QazAqparat - Aımaqtyq «Qamqorlyq» baǵdarlamasy Keles, Jetisaı, Maqtaaral, Saryaǵash, Tólebı, Túlkibas, Arys, Saıram, Ordabasy, Báıdibek aýdandary men Túrkistan, Kentaý qalalarynda qarqyndy júzege asýda, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.
Jańadan bastaý alǵan joba aıasynda Qazyǵurt aýdanynda anyqtalǵan baspanasyz 20 otbasynyń barlyǵy úıli bolady. Bul maqsatta jergilikti bılik demeýshilermen kelissózder júrgizýde.
El Prezıdenti Qasym-Jomart Toqaev óz Joldaýynda áleýmetke qatysty birqatar tapsyrmalar bergen bolatyn. Sonyń biri – kópbalaly otbasylarǵa áleýmettik jaǵynan barynsha qoldaý bildirý. Osy tapsyrma aıasynda Túrkistan oblysynda óńir basshysy Ómirzaq Shókeevtiń bastamasymen qolǵa alynǵan «Qamqorlyq» jobasy júzege asýda.
Túrkistan oblysynda 700-den astam otbasy «Qamqorlyq» keshendi baǵdarlamasy boıynsha jan-jaqty kómek aldy. Joqshylyq taýqymetin tartqan jandarǵa qosymsha áleýmettik qoldaý kórsetýdegi jańa joba aıasynda 1534 otbasyna, ıaǵnı, 6643 adamǵa kómek kórsetilmek. Ol úshin jergilikti bıýdjetten 1,6 mlrd teńge kóleminde qarjylaı qoldaý kórsetý kózdelgen.
Qaıyrymdy iske jergilikti atqarýshy organ ókilderi, aýdandyq máslıhat depýtattary men «Nur Otan» partııasy Túrkistan oblystyq fılıalynyń tóraǵasy bastaǵan bastaýysh partııa uıymdarynyń jetekshileri jáne jeke kásipkerler atsalysýda. Osy ýaqyt arasynda aýdan, eldi meken turǵyndaryn qajetti azyq-túlikpen qamtyp, kerek bolǵan jaǵdaıda medıtsınalyq járdem berip, turaqty jumysqa ornalastyryp, mamandyǵy joq azamattarǵa qaıta oqý kýrstaryna joldama bergen. Keı otbasylarǵa demeýshilerdi tarta otyryp úı salynady. Jańa joba aýdan-qalalardaǵy kómekke zárý, kedeılik shegindegi otbasylardy anyqtap, aıaǵynan turǵyzýdy kózdeıdi.
