Qamqorlyǵyn sezindik: Qańtar oqıǵasyna kýá bolǵan shymkenttikter polıtsııaǵa alǵys aıtty

ShYMKENT. QazAqparat –Shymkenttik turǵyndar qańtar oqıǵasy kezinde qaýipsizdikti kúzetken polıtsııa qyzmetkerlerine alǵys aıtty, dep habarlaıdy QazAqparat tilshisi.

«Tártip saqshylaryna turǵyndar atynan rahmetimdi aıtamyn. Qaladaǵy qaýipsizdikti kún-tún demeı júrip qalypqa keltirdi. Ózimiz sol tártipsizdik oryn alǵan aımaqta turamyz. Qandaı oqıǵalardyń oryn alǵanyna kýá boldyq. Qatty ýaıymdadyq. Tipti kóshege shyǵa almaı qaldyq. Táýlik talǵamaı jasaǵan jumystaryna alǵys aıtamyz» - deıdi «Nursát» móltek aýdanynyń turǵyndary.

Abaı aýdanyndaǵy 8 móltekaýdannyń turǵyndary da jappaı tártipsizdik kezinde polıtsııanyń qamqorlyǵyn sezindik deıdi.

«Qasymyzda polıtsııa qyzmetkerleri bolǵanda ózimizdi qaýipsiz sezinemiz. Sebebi, polıtsııa árdaıym halyqtyń janynda. Jappaı tártipsizdikti de toqtatty. Kún-tún demeı kezekshilikte turdy. Tártip saqshylaryna alǵysymyz sheksiz» - dedi vıdeo úndeý jasaǵan turǵyndar.

Qala turǵyny Dına Jumabekova polıtsııa qyzmetkerleriniń jumysyn joǵary baǵalaıdy.

Táýlik talǵamaı qyzmet etetin tártip saqshylarynyń alǵys aıtý azamattyq boryshymyz dep biledi.

«Tártip saqshylary qańtar oqıǵasynda tártipsizdikke tosqaýyl qoıdy. Otbasyn tastap, qıyndyqpen kúresti. Óz ómirin qaýip qaterge tikti. Mundaı erlik kez kelgen adamnyń qolynan kelmeıdi. Sondyqtan alǵysymdy aıtamyn» deıdi ol.