Qamqorlyqsyz qalǵan balalar statsıonarlarǵa ýaqytsha ornalastyrylady - DSM
ASTANA. KAZINFORM –Densaýlyq saqtaý mınıstrliginiń buıryǵymen statsıonarlyq jaǵdaılarda medıtsınalyq kómek kórsetýdi uıymdastyrý standarttaryna ózgerister engizildi.
Mınıstrlik bekitken túzetýlerge sáıkes, endi statsıonarlar quramyndaǵy balalar bólimsheleri men kópbeıindi balalar statsıonarlarynda emdelip jatqan balalar úshin qolaıly jaǵdaılar jasalýy tıis.
Atap aıtqanda, mundaı medıtsınalyq uıymdarda balalar úshin oıyn oınaýǵa jáne tynyǵýǵa arnalǵan orta qalyptastyrý kózdelgen. Sonymen qatar mektep jasyndaǵy balalardyń uzaq merzimdi emdelýi barysynda úzdiksiz bilim alýyna múmkindik beriledi.
Sondaı-aq buıryqta jetim balalar men ata-anasynyń qamqorlyǵynsyz qalǵan balalarǵa qatysty qosymsha sharalar da qarastyrylǵan.
– Qorǵanshylyq nemese qamqorshylyq jónindegi fýnktsııalardy júzege asyratyn organdardan atalǵan sanattaǵy balalar týraly málimetter túsken jaǵdaıda, olar anyqtalǵan jeri boıynsha medıtsınalyq kómek kórsetetin densaýlyq saqtaý uıymdaryna úsh táýlikke deıingi merzimge ornalastyrylýy qamtamasyz etiledi, – delingen resmı habarlamada.
Buıryq 2025 jylǵy 7 qazannan bastap zańdy kúshine enedi.
Buǵan deıin 2024 jyly elimizdiń statsıonarlarynda 3,4 mln-nan astam patsıent emdelgenin jazǵanbyz.