Qamystybas balyq pıtomnıgi metrologııa zańnamasyn buzǵan

ASTANA. KAZINFORM – Tehnıkalyq retteý jáne metrologııa komıteti Qyzylorda oblysynyń Aral aýdanynda ornalasqan «Qamystybas balyq pıtomnıgi» qyzmetinde ólshem birligin qamtamasyz etý salasyndaǵy zańnamany buzý faktilerin anyqtaǵan. 

— Komıtettiń aýmaqtyq bólimshesi júrgizgen josparly tekserý barysynda tekserý týraly qoldanystaǵy sertıfıkattarsyz ólsheý quraldaryn paıdalanǵan. Zańnamanyń buzylýy janýarlar dúnıesin qorǵaýǵa, ósimin molaıtýǵa jáne paıdalanýǵa, orman sharýashylyǵyn júrgizýge, sondaı-aq tabıǵı sý resýrstarymen jumys isteýge baılanysty qyzmetti júzege asyrý kezinde senimsiz ólsheý quraldaryn paıdalanǵany anyqtaldy, — delingen habarlamada.

«Ólshem birligin qamtamasyz etý týraly» zań talaptaryna sáıkes memlekettik metrologııalyq baqylaýǵa jatatyn ólsheý quraldary paıdalanýǵa berilgenge deıin, jóndeý júrgizilgennen keıin jáne odan ári paıdalaný protsesinde mindetti túrde tekserilýi tıis.

Zań buzý faktisi boıynsha mekemeniń laýazymdy adamy qoldanystaǵy zańnamaǵa sáıkes ákimshilik jaýapkershilikke tartyldy. Qazirgi ýaqytta kásiporyn anyqtalǵan zań buzýshylyqtardy joıý jáne qyzmetti metrologııalyq normalarǵa sáıkes keltirý boıynsha sharalar qabyldap jatyr.