Qamys órtimen kúres: Atyraýda 300 gektar jer áli de ot qushaǵynda

ASTANA. KAZINFORM — Qazirgi ýaqytta shamamen 300 gektar aýmaqtaǵy órtti sóndirý jumystary jalǵasyp jatyr, dep habarlaıdy TJM baspasóz qyzmeti.

Atyraý oblysynda «Aq Jaıyq» memlekettik tabıǵı rezervaty aýmaǵynda shamamen 600 gektar jerdi qamtyǵan qamys órtendi. Órt Erkinqala aýylynan 15 shaqyrym jerde tirkeldi.

— QR Tótenshe jaǵdaılar mınıstrliginiń «Qazavıaqutqarý» áýe tehnıkasy oqıǵa ornyna tartyldy. Sý tógý qurylǵysy bar MI-8 tikushaǵy órt oshaqtaryna 9 márte sý shashyp, jalpy 27 tonna sý tókti, — delingen habarlamada.

Tótenshe jaǵdaılar departamentiniń málimetinshe, órttiń eldi mekenderge taralý qaýpi joq. Tilsiz jaýmen kúreske Atyraý oblysy TJD men «Aq Jaıyq» rezervatynyń qyzmetkerleri jumyldyryldy — barlyǵy 82 adam jáne 17 tehnıka. Sondaı-aq oqıǵa ornynda baılanys pen úılestirýdi qamtamasyz etý úshin komandalyq-shtabtyq avtokólik ornalastyryldy.

Eske sala keteıik, buǵan deıin Atyraýdy taǵy da «Aqjaıyq» tabıǵı rezervatynda janǵan qamys tútini basqanyn jazǵan edik.

Sondaı-aq, jergilikti tótenshelikter Atyraý turǵyndaryna tútin men ystyń ıisine baılanysty kóshege shyqpaýdy eskertti.

Buǵan deıin qamys órtine tikushaqpen 12 tonna sý tógilgeni belgili boldy.