Kamerýnda Pol Bııanyń qaıta saılanýy jappaı narazylyq týdyrdy

ASTANA. KAZINFORM — Kamerýnda 12 qazanda ótken prezıdenttik saılaýda qazirgi memleket basshysy Pol Bııanyń jeńiske jetkenin Konstıtýtsııalyq keńestiń jarııalaýynan keıin elde jappaı narazylyq bastaldy, dep habarlaıdy TASS.

Oppozıtsııa uıymdastyrǵan sherýler eldiń birneshe qalasynda júrip jatyr. Narazy top saılaý nátıjesin moıyndaýdan bas tartqan.

Dýala qalasynda polıtsııa demonstranttardy taratý úshin kózden jas aǵyzatyn gaz qoldandy. Sherýge shyqqandardyń negizgi ortalyǵyna aınalǵan Nıý-Bell aýdany qorshaýǵa alynyp, kireberis pen shyǵaberisterge blok-beketter ornatylǵan. BAQ málimetinshe, 26 qazanda Dýaladaǵy úkimetke qarsy aktsııa kezinde tórt adam qaza tapqan.

Eldiń soltústigindegi Garýa qalasynda da jaǵdaı shıelenisti kúıinde qalyp otyr. Bul qala oppozıtsııanyń negizgi tiregine aınalǵan.

Konstıtýtsııalyq keńestiń sońǵy derekterine sáıkes, 1982 jyldan beri bılikte otyrǵan 92 jastaǵy Pol Bııa saılaýda 53,66% daýys jınap, segizinshi merzimge qaıta saılandy. Al onyń qarsylasy Bakarı Issa Chıroma 35,2% daýys alǵan.

Chıroma óz kezeginde saılaýda shamamen 60% daýys jınap jeńiske jetkenin málimdep, ózge nátıjelerdi moıyndamaıtynyn jáne Konstıtýtsııalyq keńes ony jeńimpaz dep tanymaǵan jaǵdaıda jappaı narazylyq uıymdastyratynyn eskertken. BBC dereginshe, saıasatker qazir Garýa qalasynda júr.

Aıta ketsek, Pol Bııa 1982 jyldan beri bılikte jáne qazirgi tańda álemdegi eń uzaq ýaqyt qyzmet atqaryp otyrǵan memleket basshylarynyń biri. 2019 jyldyń 25 shildesinen bastap ol Týnıs prezıdenti Bedjı Kaıd Es-Sebsıdiń qaıtys bolýynan keıin álemdegi eń jasy úlken qyzmettegi prezıdent atandy. Al 2022 jyldyń 8 qyrkúıeginen keıin, Ulybrıtanııa patshaıymy Elızaveta II dúnıeden ozǵan soń, álemdegi eń egde jastaǵy bıleýshi memleket basshysy bolyp otyr.