Kamerýn prezıdenti 92 jasynda segizinshi merzimge saılaýǵa túspek

ASTANA. KAZINFORM — Kamerýn prezıdenti Pol Bıııa kezekti prezıdenttik saılaýǵa óz kandıdatýrasyn usynatynyn málimdedi.

92 jastaǵy memleket basshysy X áleýmettik jelisindegi paraqshasynda 2025 jyldyń 12 qazanynda ótetin saılaýǵa qatysatynyn jazdy.

— Sizderge qyzmet etýge degen meniń yntam — qazirgi qıyndyqtarmen teń dárejede. Biz birge kez kelgen kedergini eńsere alamyz, — dep jazdy Pol Bıııa.

Buǵan deıin Kamerýn Ulttyq assambleıasynyń tóraǵasy Kavaıe Iegı Djıbrıl Bıııany eldiń soltústik aımaǵynan kandıdat retinde usynǵanyn málimdegen bolatyn.

Pol Bıııa 1982 jyldan beri bılikte otyr. 2019 jyldyń 25 shildesinen bastap Pol Bıııa álemdegi eń qart qyzmettegi prezıdent bolyp sanalady. Al 2022 jyldyń 8 qyrkúıeginen beri, Ulybrıtanııa patshaıymy Elızaveta II qaıtys bolǵannan keıin, ol álemdegi eń egde jastaǵy qyzmettegi memleket basshysy atandy.

Kamerýn Konstıtýtsııasy prezıdenttikke úmitkerdiń jasyna nemese merzim sanyna shekteý qoımaıdy, bul Bıııaǵa segizinshi merzimge qatarynan qatysýǵa múmkindik beredi.

Buǵan deıin Nıgerııanyń burynǵy prezıdenti Muhammadý Býharı 83 jasynda Londondaǵy aýrýhanada kóz jumǵanyn jazǵanbyz.