Kameraldyq baqylaý júrgizý qaǵıdalary ózgerdi
ASTANA. KAZINFORM — Qarjy mınıstriniń mindetin atqarýshynyń 2026 jylǵy 2 qyrkúıektegi buıryǵymen kameraldyq baqylaý júrgizý qaǵıdalaryna ózgerister men tolyqtyrýlar engizildi.
Jańa talap boıynsha memlekettik aýdıt obektisi habarlamany 10 jumys kúni ishinde oryndaýǵa tıis. Bul merzim habarlama tabys etilgen nemese veb-portal jáne (nemese) tsıfrlyq júıeler arqyly alynǵan kúnnen keıingi kúnnen bastap esepteledi.
Eger memlekettik aýdıt obektisi kameraldyq baqylaý nátıjesinde anyqtalǵan buzýshylyqtardy habarlama tabys etilgen kúnnen keıingi kúnnen bastap 10 jumys kúni ishinde óz betinshe joısa, laýazymdy tulǵa ákimshilik jaýapkershilikke tartylmaıdy.
Baǵa usynystaryn suratý tásilimen ótkiziletin memlekettik satyp alýǵa kameraldyq baqylaý úsh jumys kúni ishinde júrgiziledi. Bul merzim osy tásilmen ótkiziletin memlekettik satyp alý týraly málimet veb-portalda ornalastyrylǵan kúnnen bastap esepteledi.
Sondaı-aq qaǵıdalar memlekettik satyp alý týraly sharttarǵa jasalatyn qosymsha kelisimderdi kameraldyq baqylaýǵa qatysty jańa tarmaqpen tolyqtyryldy. Mundaı baqylaý qosymsha kelisimniń jobasy ónim berýshige (merdigerge) qol qoıýǵa jiberilgen kúnnen bastap úsh jumys kúni ishinde júrgiziledi.
Buıryq 2026 jylǵy 19 qyrkúıekten bastap qoldanysqa engiziledi.
Buǵan deıin Atyraý oblysynda kameraldyq baqylaý nátıjesinde 1 092 memlekettik satyp alý boıynsha 22,5 mlrd teńgeden astam buzýshylyq anyqtalǵanyn jazǵan edik.
