Kameralardan kóshe tynyshtyǵyn úzdiksiz qarap otyramyz - aqtóbelik polıtseı
AQTÓBE. QazAqparat - Oblystyq polıtsııa departamentiniń Jedel basqarý ortalyǵynda eńbek etetin Almat Ulyqpanov kameralar arqyly kóshe tynyshtyǵyn baqylap otyrady. Ol usaq buzaqylyq, otbasylyq kıkiljińder, túngi tynyshtyqty buzý, urlyq sekildi qylmysty qalt jibermeıdi, dep habarlaıdy QazAqparat tilshisi.
Almat Ulyqpanov alǵashynda Jergilikti polıtsııa basqarmasynyń jol-patrýldik polıtsııa batalonynda jumys istedi. Qyraǵy ári óz isiniń sheberi kóp uzamaı 102 telefonyna kelip túsken qońyraýlardy qabyldap, áriptesterin der kezinde oqıǵa ornyna jiberýmen shuǵyldana bastady. Qazir ol qaladaǵy kameralardy qarap otyrady. Ári óz isiniń mamany sońǵy úsh jylda «Úzdik polıtseı» ataǵyn ıelenip júr. Eńbek jolyn 2011 jyly bastaǵan jas saqshy az ýaqyt ishinde birneshe qylmyskerdi ustaǵan.
«Batalonda eńbek etken jyldarym men úshin úlken sabaq boldy. Alǵash jumysqa kiriskende tájirıbe jınap, adamdarmen til tabysýdy úırendim. Qazir jedel basqarý ortalyǵyndamyn. Ár jumystyń óz jaýapkershiligi bar. Qaı salada bolmasyn isińe muqııat qarap, tyndyrymdy bolýǵa umylý kerek. Munda 102-ge kelip túsken aqparattarǵa saralap, qajet kezde polıtsııa jasaqtaryn jiberý, oqıǵa orynyna tez jetý jaǵy mańyzdy. Qazir bizde beınebaqylaý kameralarynyń sany kóbeıdi. Sapasy da jaqsy. Qaladaǵy kópqabatty úılerdiń aýlalary men qoǵamdyq oryndar, saýda úıleri, saıabaqtar, demalys oryndary, mektep, balabaqshalar, oqý oryndary, ákimshilik ǵımarattar, kóshe qıylystary, bazarlar mańy jiti qadaǵalanady. Beınebaqylaý kameralarynyń kóbeıgeni turǵyndardyń qaýipsizdigin saqtaýǵa, quqyq buzýshylyqtardyń aldyn alýǵa septigin tıgizedi. Árıne kúnde túrli jaıttardy baqylap otyramyz. Kóbinese usaq buzaqylyq, otbasylyq kıkiljińder, túngi tynyshtyqty buzý, urlyq sekildi oqıǵalar tirkeledi. Jaz aılarynda dámhana, meıramhana mańyndaǵy tóbelesterdiń aldyn alýǵa septigimizdi tıgizemiz», - dedi Almat Ulyqpanov.
Polıtsııa qyzmetkeri qoǵamdaǵy qaýipsizdik pen turǵyndardyń tynyshtyǵyn saqtaý basty mindetimiz dep sanaıdy. Ártúrli jaǵdaıda ózińdi psıhologııalyq turǵydan da ustaı bilý, jumysqa jaýapkershilikpen qaraı bilý qajet. Maqsaty men mindeti aıqyn polıtsııa qyzmetkeri ózi kýá bolǵan birneshe oqıǵany eske aldy.
«Aqtóbe qalasyndaǵy avtovokzal mańynda kúndiz qart kisiniń qaltasynan aqshasyn alyp, eki buzaqy kóz aldymda qasha jóneldi. Olar jaqyn mańdaǵy jataqhanalardyń birine bet aldy. Men qýa jóneldim. Ekeýi besinshi qabatqa deıin kóterildi. Bireýi qarsylyq tanytty. Áskerı sambonyń ádisterimen bireýin jerge qulattym. Osy kezde kómekke janymdaǵy áriptesim Aslan Qaldyǵulov kelip úlgerdi. Taǵy birde Aqtóbe sý qoımasy jaǵasynda pyshaq jaraqatyn alǵan er adamnyń denesi jatqany týraly aqparatpen jolǵa shyqtyq. Qys aıy, kún aıaz ári boran bolyp tur. Sý qoımasy jaǵasyna kólik barmaıdy, jaıaýlatyp jettim de saı jaǵalap ketip qalǵan adamnyń izine tústim. Onda da áriptesim Aslan Qaldyǵulov ekeýmiz kisi ólimine kúdiktini ustadyq. Eki er adam birge ishimdik iship otyryp, ózara sózge kelip, biri ekinshisin pyshaqtap, óltirgen. Mine, osyndaı kezderde úlken jaýapkershilikpen qatar tabandylyq, qaısarlyq kerek. Biz aptasyna eki ret dene shynyqtyrý sabaqtaryna úzbeı qatysamyz. Ózim voleıbol oınaǵandy unatamyn. Biz densaýlyǵymyzǵa jiti kóńil bólip, áskerı daıarlyǵymyzdy shyńdap júremiz», - dedi ol.
Almat Ulyqpanovtyń ata-anasy dáriger. Al ózi áýlettegi alǵashqy tártip saqshysy.
«Jumysym ózime unaıdy. Biz halyqtyń ıgiligi, tynyshtyǵy úshin ýaqytpen sanaspaı, kúni-túni eńbek etemiz. Jubaıym árkez túsinistikpen qarap, moraldyq turǵydan qoldaý tanytady. Bizdiń eki balamyz bar», - deıdi polıtsııa leıtenanty Almat Ulyqpanov.
