Kameralar men aqyldy júıeler: Astanada qaýipsizdik qalaı qamtamasyz etiledi

ASTANA. KAZINFORM – 2024 jyly elordada kisi óltirý, tonaý, qaraqshylyq, urlyq sııaqty qylmystardyń tirkelýi azaıdy. Bul úrdis bıyl da jalǵasyp jatyr. Bul týraly Astana qalasynyń polıtsııa departamentinde aıtyldy, dep habarlaıdy qala ákimdiginiń resmı saıty.

Elorda polıtsııa departamentiniń bastyǵy Marat Tólebaevtyń aıtýynsha, jyl basynan beri qalada qylmys deńgeıin 10% tómendetýge, tıisinshe azamattardyń qaýipsizdigin qamtamasyz etýge, zamanaýı tsıfrlyq sheshimderdi belsendi paıdalanýǵa baǵyttalǵan zańnamalyq bastamalardy kúsheıtý arqasynda qol jetkizildi. Sondaı-aq, qylmystyń aldyn alýda kadrlyq áleýetti arttyrý mańyzdy ról atqardy.

«Polıtsııa qadamdyq qoljetimdilikte» qaǵıdaty sheńberinde polıtseılerdiń qoǵamdyq oryndarda turaqty bolýynyń áseri qamtamasyz etiledi.

«Ótken jyly 6 ýchaskelik polıtsııa pýnkti men 3 statsıonarlyq modýldik beket paıdalanýǵa berildi, jyl sońyna deıin taǵy 13 PBB jáne 3 beket iske qosýdy josparlap otyrmyz. Tsıfrlyq jobalar iske asyrylýda, sonyń arqasynda polıtsııa qyzmetiniń birqatar baǵyty boıynsha jumystyń tıimdiligi artty. Syrtqy qyzmet mamandary zamanaýı smartfondarmen jáne planshettermen qamtamasyz etilgen», - dedi Tólebaev.

Sonymen qatar, «Kilem tóseý» jobasyn júzege asyrý aıasynda qalalyq beınekameralar jelisi keńeıtilýde. Qazirgi ýaqytta elordada 200 myńnan astam beınekamera jumys isteıdi, onyń ishinde jedel basqarý ortalyǵyna (JBO) 36 myńy shyǵaryldy.

Olardyń kómegimen 3 myńnan astam qylmys ashylyp, 27 myń ákimshilik quqyq buzýshylyq anyqtaldy. Budan basqa, beıneanalıtıka júıesi – «Ýázir» apparattyq-baǵdarlamalyq kesheni paıdalanylady, onyń kómegimen 563 adam, onyń ishinde 327 kúdikti adam men quqyq buzýshy anyqtaldy.

Balalardyń qaýipsizdigin qamtamasyz etý úshin JBO-da 7 myńǵa jýyq beınekamera men bilim berý mekemeleriniń 238 dabyl túımesi shyǵaryldy.

Sondaı-aq, elordada azamattardyń ótinishterin kóp arnaly qabyldaý jobasy engizildi. Bir jyl ishinde 8,5 myńnan astam ótinish qabyldandy, onyń ishinde 139 beıne qońyraý jáne 8513 mátindik habarlama bar.

Astana polıtsııasynyń basshysy tsıfrlyq tehnologııalardyń qarqyndy damýyn eskere otyryp, asa mańyzdy mindetterdiń birine aınalǵan kıberqylmyspen kúreske jeke toqtaldy.

Bul máseleni sheshý úshin elordalyq PD-da ınternet-alaıaqtyqtardy ashý jáne anyqtaý ádisterin jetildirýge mamandanǵan beıindi basqarma quryldy.

Marat Tólebaevtyń aıtýynsha, júrgizilip jatqan aqparattyq-túsindirý jumystary ınternet-alaıaqtyq jaǵdaılarynyń tómendeýine áser etti. Sondaı-aq, 2024 jylǵy shildede Ulttyq Banktiń bazasynda zańsyz tranzaktsııalardy anyqtaýǵa jáne jedel buǵattaýǵa múmkindik beretin Antıfrod-ortalyqtyń ashylýy ınternet-alaıaqtyqtardyń ashylýynyń artýyna yqpal etti. Oǵan 60-tan astam uıym, onyń ishinde bankter, iri tólem, mıkroqarjy uıymdary jáne quqyq qorǵaý organdary qosylǵan.

2024 jyldyń qorytyndysy boıynsha barlyǵy 161 adam jáne kıberqylmyskerlerdiń 3 toby ustaldy, 1350 ınternet-resýrsty buǵattaýǵa jiberildi, 1116 adam buǵattaldy.

«Qazir esirtki zattaryn ótkizý jańa deńgeıge kóterildi. Esirtki satýshylar ınternet-resýrstar men tólem júıeleri arqyly baılanyssyz ádisti qoldanady. 238 esirtki saıty buǵattaldy», - dedi Marat Tólebaev.

Ótken jyly barlyǵy 1116 esirtki quqyq buzýshylyq anyqtaldy. 342 kg esirtki, onyń ishinde 23 kg sıntetıka tárkilendi. 3 myńǵa jýyq esirtki graffıtı, onyń ishinde qala turǵyndarynyń qatysýymen joıyldy.

Usaq quqyq buzýshylyqtardyń aldyn alýǵa jáne «nóldik tózimdilik» qaǵıdasyn qurýǵa qatysty Astana PD derekteri boıynsha bir jyl ishinde 1,5 mln-nan astam ákimshilik quqyq buzýshylyq anyqtaldy.

Elorda PD basshysy turmystyq zorlyq-zombylyq máselesine jeke toqtaldy. Ol ótken jyly 7 myń deboshır ákimshilik jaýapkershilikke tartylǵanyn, bul 2023 jylmen salystyrǵanda 3 ese kóp ekenin, onyń 1433-i qamaýǵa alynǵanyn, 21-i qylmystyq jaýapkershilikke tartylǵanyn habarlady.

Jasóspirimder qylmysynyń taqyryby da shet qalǵan joq. Aldyn alý jumystaryn kúsheıtý maqsatynda mektepterge basshylyq, jedel ýákilder, ýchaskelik ınspektorlar jáne ıývenaldy polıtsııa jaýapty bolyp bekitildi.

Astanada Belsendi uzaq ómir súrý ortalyǵy ashyldy.