Kamera joq aımaqtarda kólikterdi drondar baqylaıdy

ASTANA. KAZINFORM — Kólik apattarynan adam ólimi kóbinese Almaty, Jambyl, Túrkistan jáne Mańǵystaý oblystarynda tirkeledi. ІІM mamany munyń sebebin túsindirdi.

— Biz jol-kólik oqıǵalarynyń sany, onda qaza bolǵandar men jaraqat alǵandardy bólek jiktep qarastyramyz. Jol-kólik oqıǵalary, árıne, megapolısterde kóp bolady. Sebebi Astana, Almaty, Shymkent qalalarynda avtokólik sany kóp. Al adam shyǵynymen bolatyn jol-kólik oqıǵalary kóbine Almaty, Jambyl, Túrkistan, Mańǵystaý oblystarynda tirkeledi. Óıtkeni ondaǵy tranzıt aǵyny óte joǵary, — deıdi QR ІІM Ákimshilik polıtsııa komıtetiniń resmı ókili Aqtoty Boranova «Búgin LIVE» baǵdarlamasyna bergen suhbatynda.

Mınıstrlik mamany mundaı apattardyń aldyn alý úshin joǵary tehnologııalar da qoldanylyp jatqanyn aıtady.

— Mundaı apattardyń aldyn alyp, A pýnktinen V pýnktine aman-esen barý úshin «Ortasha jyldamdyq» uǵymy engizildi. Odan keıin jol-patrýldik avtokólikterinde avtomatty túrde tirkeý júıeleri ornatylǵan. Qazirgi tańda qala syrtyndaǵy joldarda olardyń sany shamamen 500-den asty. Al kameralar joq jerdegi kólik qozǵalysyn baqylaý úshin kóbine drondar qoldanylady. Túptiń túbine kelgende, atqarylyp jatqan jumystardyń bári azamattardyń qaýipsizdigi úshin, — deıdi stýdııa qonaǵy.

Aıta keteıik, Ulytaý oblysynda mas kúıde kólik basqarǵan 15 adam jaýapqa tartyldy.