Kámelettik jasqa tolmaǵandarǵa qarsy seksýaldy sıpattaǵy qylmys úshin sottalǵandar shartty túrde merziminen buryn bosap shyǵa almaıdy - I.Merkel

ASTANA. 7 qazan. QazAqparat Kámelettik jasqa tolmaǵandarǵa qarsy seksýaldy sıpattaǵy qylmys úshin sottalǵandar shartty túrde merziminen buryn bosap shyǵa almaıdy. «KTK» telearnasy «Halyq qyzmetshisi» baǵdarlamasynyń qonaǵy bolǵan QR Bas prokýrorynyń birinshi orynbasary Iogan Merkel osylaı dedi.

«Qazirgi ýaqytta biz Qylmystyq kodeksti ázirleý aıasynda kámelettik jasqa tolmaǵandarǵa qarsy seksýaldy sıpattaǵy qylmysy úshin sottalǵan adamdardy shartty túrde merziminen buryn bosatpaý sharasyn qabyldadyq», - dedi I.Merkel.

Sonymen qatar ol jańa Qylmystyq is júrgizý kodeksinde tergeý aldy tekserý men qylmystyq isti qozǵaý protsedýralarynyń bolmaıtyndyǵyn atap ótti.